«Habar» agenttiginiń tapsyrysymen Sidnei Olimpiadasynyń chempiony marqum Bekzat Sattarhanov týraly kórkem film jýyrda elimizdiń úlken ekrandarynan kórermenge jol tartady, dep habarlaidy "Ult aqparat".
Kartinada jasyndai jarq etken jas ǵumyr – Bekzattyń ómiri men sporttaǵy jetistigi keńinen sýretteledi.
Týyndynyń rejisseri - Murat Bidosov, stsenariiin Serjan Zakeruly jazǵan. «Bekzat» dramasyn 3 qazannan, iaǵni búginnen bastap elimizdiń kinoteatrlarynan tamashalai alasyz.
Filmniń siýjettik jelisinde Bekzat Sattarhanov ómiriniń úsh kezeńi qamtylady. Balalyq shaǵy, boz bala kezeńi jáne ómiriniń sońǵy sáti. 90 jyldardyń basyndaǵy qiyn-qystaý zamanǵa tap kelgen Bekzattyń balalyǵy kóp qiyndyqtarmen ótedi. Túrkistan qalasyndaǵy temir joldy boilai ornalasqan shaǵyn aýyldyń qarapaiym tirshiligi bala Bekzattyń kózimen beinelenedi. Onyń armany, namysqoi bitimi ár bir sátte synalyp otyrady.
Birde ata-anasy Bekzatty kúreske qatyssyn dep bapkerge aparady. Onda Bekzat óziniń sergektigimen kózge túsedi. Degenmen kúreske qatysqan balanyń boiy óspei qalady degen túsinikpen ony boksqa aýystyrady. Bapkerimen tanysqan kúnnen bastap, bul sport túrine erekshe zeiini ashylǵan Bekzat - kún saiyn erinbei jattyǵyp, alǵash ret Túrkistanda ótken saiysta júldeli orynǵa ie bolady. Boz bala shaǵynda Germaniiada ótken týrnirde top jaryp, bapkerler olimpiiadaǵa daiarlaý jattyǵýlaryna qabyldaidy. 1999 jyly Tashkentte ótken búkil Aziia birinshiliginde kúmis júldege ie bolyp, olimpiiada oiyndaryna joldama alady. Solai 2000 jyly Sidneide tartysty oiyndar ótkizip, altyn medaldyń iegeri atanady.
Filmniń túsirilim jumystary Túrkistan, Almaty jáne Ystambul qalalarynda ótken. Basty róldi jas akter Samat Ázimqulov somdaidy. Ol 2006-2007 jyldary kikbokstan jastar arasynda eki ret Qazaqstan chempiony bolǵan. Sonymen qatar týyndydan Ǵalymbek Ospanov, Murat Jarylqasynov, Maira Maqulbekova, Dýlyǵa Aqmolda, Qýanysh Muqatai, Baqdaýlet Shaimahan jáne basqa da akterlerdi kóre alasyzdar.
