Almaty qalasynyń bas sanitar dárigeri Jandarbek Bekshin COVID-19 taralýynyń aldyn alý sharalary týraly jańa qaýlysynyń talaptaryn túsindirdi, dep habarlaidy QazAqparat.
Onyń aitýynsha, epidemiologiialyq jaǵdaidyń kúrdelenýine, halyq arasynda «delta» shtamynyń qarqyndy taralýyna bailanysty jáne epidemiologiialyq jaǵdaidy turaqtandyrý, bilim berý mekemelerinde jańa oqý jylyn shtattyq rejimde uiymdastyrý maqsatynda jańa qaýly qabyldandy.
«Ashyq» jobasyna qatysýyna qaramastan barlyq mekemeler 17-31 tamyz aralyǵynda demalys jáne mereke kúnderi jumys istemeidi. Demalys jáne mereke kúnderi oiyn-saýyq saiabaqtary, attraktsiondar, bólshek saýda jáne qaladaǵy saiabaqtardyń aýmaǵyndaǵy qoǵamdyq tamaqtaný oryndarynyń qyzmetine tyiym salynady», - dedi Jandarbek Bekshin.
Jańa qaýlyǵa sáikes, meditsinalyq qarsy kórsetilimderi bar jáne sońǵy úsh aida koronavirýspen aýyryp shyqqan adamdardy qospaǵanda, pedagogter men tehnikalyq personal, jataqhana men ashana qyzmetkerleri 100% vaktsina saldyrýy qajet.
Sondai-aq qaladaǵy barlyq bilim berý jáne tárbie berý mekemelerine «Ashyq» jobasy engiziledi. Mektepterde dene shynyqtyrý sabaqtary dalada ótkiziledi.
Meditsinalyq qarsy kórsetilimi bar jáne sońǵy úsh aida syrqattanǵan adamdardy qospaǵanda, 18 jasqa tolǵan barlyq stýdentter vaktsina saldyrýy qajet.
Qaýly 17 tamyzdan bastap kúshine enedi.
Qaýlynyń tolyq mátinin myna jerden oqýǵa bolady.
