Almaty qalasynyń bas memlekettik sanitarlyq dárigeri, Sanitarlyq-epidemiologiialyq baqylaý departamentiniń basshysy Jandarbek Bekshin qala turǵyndaryna maska rejimi men áleýmettik qashyqty saqtap, adam kóp jinalatyn jerge barmaýǵa shaqyrdy, dep habarlaidy "Ult aqparat".
Búgin Almatyda Densaýlyq saqtaý ministri Aleksei Tsoi, vitse-ministr Ajar Ǵiniiat pen Sanitarlyq-epidemiologiialyq baqylaý komitetiniń tóraiymy Aijan Esmaǵambetova bastaǵan respýblikalyq komissiia músheleriniń qatysýymen koronavirýs infektsiiasynyń taralýyna jol bermeý jónindegi qalalyq komissiianyń keńeitilgen shuǵyl otyrysy ótti.
«Jiynda biylǵy epidemiologiialyq jaǵdaiǵa bailanysty máseleler talqylandy. Qala statsionarlary men emhanalaryndaǵy patsientter men personal aǵynynyń qozǵalysyn saqtaý, halyqqa meditsinalyq kómek kórsetý, infektsiialyq baqylaý talabynyń saqtalýy turǵysynan birqatar meditsinalyq uiymdardyń jumysy tekserildi. Sondai-aq, qalanyń sanitarlyq-epidemiologiialyq qyzmetiniń qatysýymen jedel shtab ótkizildi»,- deidi Jandarbek Bekshin.
Sonymen qatar, ol respýblikalyq komissiia músheleri qalada epidemiiaǵa qarsy qabyldanǵan sharalardy maquldaǵanyn jetkizdi.
«Almatyda júzege asyrylǵan jumys algoritmin, buryn bekitilgen aimaqtarǵa bólý josparlaryn iske asyrýdy jáne infektsiialyq qaýipsizdikti saqtaýdy, sondai-aq úidegi statsionarlardaǵy adamdarǵa meditsinalyq baqylaý júrgizý úshin Telemeditsina ortalyǵyn paidalaný qajettigin eskere otyryp, somatikalyq meditsinalyq uiymdardy kovidtik baǵdarǵa aýystyrý shemasyn qoldady. Sonymen qatar, aldaǵy ýaqytta atqarylar jumystar boiynsha birqatar tapsyrma berildi», - deidi ol.
Almaty «qyzyl» aimaqta tur. Biyl megapoliste KVI-di juqtyrǵan 12 800 adam tirkeldi. Mýtatsiiaǵa túsken shtamnyń baryn eskere otyryp, indetti juqtyrýdyń joǵarǵy deńgeii saqtalýda.
Ózgerister baiqalǵan aimaqtardy genomdyq retke keltirý nátijeleri belgili boldy – koronavirýs «britandyq» jáne «ońtústikafrikalyq» shtamdaryna tán mýtatsiialar anyqtaldy.
Jańa shtamdardyń kontagiozy joǵary. Aldyńǵy bazalyq shtammen salystyrǵanda jańa shtamdardyń juqtyrý kórsetkishi 70% deiin joǵary. Iaǵni, bul infektsiia – óte juqpaly. Mine,osy jaǵdai megapoliste anyqtalǵan infektsiialardyń órshýine ákeldi.
Qalada qalyptasqan epidemiologiialyq jaǵdaidy eskere otyryp, J.Bekshin qala turǵyndaryna úndeý jasady.
«Qurmetti almatylyqtar jáne qala qonaqtary. Búginde ózińizdi KVI-den qorǵaýdyń jalǵyz joly – vaktsinatsiia. Sáýir aiynda biz vaktsinalardyń jańa dozalaryn kútip otyrmyz. Sonymen qatar, Almatyda eki million turǵynnyń bar ekenin, sondai-aq kóshi-qonnyń joǵary deńgeiin eskere otyryp, qazir jańa shtamdar ainalymy aiasynda barshańyzdy kovidke qarsy sharalardy kúsheitýge shaqyramyn. Betperde rejimi men áleýmettik qashyqty saqtap, qoǵamdyq oryndarǵa barmaýǵa, adam kóp jinalatyn jerden aýlaq bolýǵa shaqyramyn», - deidi qalanyń bas sanitar dárigeri Jandarbek Bekshin.
