Úkimet basshysynyń orynbasary Roman Skliar Almaty qalasynyń Talǵar aýdanynda zańsyz jer bergen laýazymdy tulǵalarǵa qatysty sotqa deiingi tergeý amaldary júrgizilip jatqanyn málimdedi, dep habarlaidy "Ult aqparat".
«Áýejai aýmaǵynan tys zańsyz qurylys boiynsha: Almaty qalasy boiynsha sybailas jemqorlyqqa qarsy is-qimyl qyzmeti Talǵar aýdanynda Almaty qalasynyń áýejaiynyń mańynan zańsyz jer telimderin berý boiynsha sotqa deiingi tergeý amaldaryn júrgizip jatyr. Anyqtalǵanyndai, 2015-2019 jyldar aralyǵynda Talǵar aýdanynyń laýazymdy tulǵalary qyzmetin asyra paidalanyp, áýejaidyń sanitarlyq qorǵaý aýmaǵynan turǵyn úi qurylysyn salýǵa zańsyz jer berip kelgen», - dedi ol.
Aita keterligi, osy jiynda Roman Skliar BekAir ushaǵynyń apatqa ushyraý sebebin atady.
Eske sala ketsek, 2019 jyldyń 27 jeltoqsanynda Almatydan Nur-Sultan qalasyna ushyp shyqqan Bekeir kompaniiasynyń ushaǵy radardan joǵalyp ketti. Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy. Ushaq jerge qulaǵan soń syrǵanap baryp áýejai aýmaǵyna jaqyn tustaǵy aýyl shetindegi eki qabatty úige soǵylǵan.
QR Premer-Ministri Asqar Maminniń tóraǵalyǵymen ushaq apatynyń sebepterin tergeý boiynsha Úkimettik komissiianyń otyrysy ótkizilgen edi. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia jiberildi.
