Bek Air áýekompaniiasynyń apatqa ushyraǵan Fokker-100 ushaǵyndaǵy qara jáshiktegi málimetterdi oqydy, – dep habarlady Memleketaralyq aviatsiia komiteti.
Memleketaralyq aviatsiia komiteti áýe keńistigin paidalaný jónindegi azamattyq aviatsiianyń memleketaralyq kelisimine sáikes 2019 jyldyń 27 jeltoqsanynda apatqa ushyraǵan Fokker-100 ushaǵynyń tergeý jumystaryna belsene qatysýda. MAK mamandar toby alǵashqy kúnnen beri apat bolǵan jerde jumys isteýde.
«MAK ǵylymi-tehnikalyq ortalyǵynda ushaqtaǵy ózdiginen jazylatyn reistiń jazbasy (dybysty jáne parametrli), iaǵni apat bolǵan kezde túsken jazbalary oqyldy. Materialdardyń barlyǵy tergeý komissiiasyna tapsyryldy. Bul málimetterdiń saraptama nátijeleri oqiǵanyń qalai bolǵanyn qalpyna keltirýge jáne apattyń saldaryn anyqtaýǵa múmkindik beredi» delingen habarlamada.
Tergeý jónindegi komissiianyń sheshimi boiynsha MAK Niderland, Qazaqstan jáne EASA mamandarymen birigip ushýdyń matematikalyq modeldeý jumystaryn bastaǵan.
Buǵan deiin, QR premer-ministriniń orynbasary Roman Skliar Fokker-100 ushaǵynyń apatqa ushyraýyna ushaqtyń syrtyna qatyp qalǵan muzdar sebep bolýy múmkin degen boljam aitqan.
