«Bek Air» áýe kompaniiasynyń ushpai qalǵan reisteriniń bilet quny jolaýshylarǵa tolyǵymen qaitarylady, dep habarlaidy "Ult aqparat" Indýstriia jáne infraqurylymdyq damý ministrligine silteme jasap.
«Halyqaralyq áýe kemesi qaýymdastyǵynyń (IATA) aqparatyna sáikes, qazirgi ýaqytta «Bek Air» áýe kompaniiasynan Z9 jeke identifikatory (kody) qaitarylyp alynbaǵan. Osy kod atalǵan áýe kompaniiasyna tiesili», - delingen ministrliktiń habarlamasynda.
Z9 kodyn qaitaryp alýdyń ózi de – «Bek Air» oryndalmai qalǵan reisteriniń aviabiletteriniń qaitarý jumysyna esh áser etpeidi.
«Áýe kompaniiasynyń IATA kody – IATA áýe kompaniiasymen berilgen 2 nemese 3 simvoldy jeke identifikator. Bul kod IATA-nyń № 762 rezoliýtsiiasyna sáikes beriledi. Áýe kompaniiasynyń kodtaryn áýe kompaniialar, bilet satylymy boiynsha agenttikter, biletterdi brondaý júieleri men aviatsiialyq tasymalǵa qatysty ózge de kásiporyndar paidalanady. «Bek Eir» áýe kompaniiasynyń oryndalmai qalǵan reisterin bilet alǵan adamdar alǵan jerinen bilet aqshasyn tolyǵymen qaitaryp ala alady», - dedi ministrlik.
Ministrlik taraptardyń biri mindetin oryndamaǵan jaǵdaida QR Azamattyq kodekstiń 9-babyna sáikes, ekinshi tarap sot organy arqyly keltirilgen materialdyq jáne moraldyq shyǵyndy talap ete alatynyn eske saldy.
Eske sala ketsek, Ushaq apaty 2019 jyldyń 27 jeltoqsanynda tańǵy saǵat jetide boldy. Bek Air áýe kompaniiasynyń "Almaty – Nur-Sultan" baǵytyndaǵy Fokker 100 ushaǵy Almaty mańyna qulady.
Ushaqta 93 jolaýshy men 5 ekipaj múshesi bolǵan. Apat 12 adamnyń ómirin qidy, qaza bolǵandardyń ishinde ushaq komandiri bar. Ekinshi ushqysh aýrýhanada jatyr.
Ishki ister ministrligi áýe apatyna sebep bolǵan úsh jaǵdaidy atady. Olar: ekipaj qateligi, tehnikalyq aqaý jáne navigatsiialyq qyzmet jumysy.
Prezident tapsyrmasymen premer-ministr jetekshilik etetin komissiia quryldy. Toqaev apattyń sebebin anyqtap, kinálilerdi qatań jazalaýdy tapsyrdy. 28 jeltoqsan elimizde jalpyulttyq aza tutý kúni boldy.
