Tórt ret prezident sailaýyna qatysatynyn aityp, biraq eshbirinde sailaýdyń sońyna deiin barmaǵan Jaqsybai Bázilbaev 9 maýsymda ótetin Qazaqstannyń kezekten tys prezident sailaýyna qatysatynyn aitty. Bul týraly ol 19 sáýirde Almatyda ótken baspasóz jiyny kezinde málimdedi.
Ol sailaýǵa "Qazaqstandaǵy orys qaýymdastyǵy" qoǵamdyq uiymynyń atynan túspek.
"Qazaqstandaǵy orys qaýymdastyǵy" Bázilbaevtyń uiym atynan sailaýǵa túsý nietin "jiyn barysynda bilgen". Jiynǵa kelgen uiym ókili "bul ótinishti endi ǵana estigenderin, bir apta ishinde aqyldasyp, sheshim qabyldaityndaryn" aitty.
Jiyn kezinde Bázilbaev sailaýaldy baǵdarlamasymen tanystyrdy.
- Qorǵanys qabiletin nyǵaitýdan bastaimyn. Eýropa odaǵy men Shanhai yntymaqtastyq uiymyn qoldaimyn. Eýraziialyq odaq aiasynda Reseige qorǵanys koalitsiiasyn qurýdy usynamyn, - dedi ol.
Bázilbaevtyń eki bettik sailaýaldy baǵdarlamasynda zeinetkerlerdi kommýnaldyq tólemnen bosatý, kóp balaly analarǵa tegin baspana berý, oqý men meditsinany tolyqtai tegin etý men ár qalada zaýyt-fabrika salý jospary bary jazylǵan.
1998 jylǵy prezident sailaýynda Bázilbaev básekelesi Nursultan Nazarbaevtyń paidasyna sailaýdan shyǵatynyn málimdegen. Azattyqtyń "Osy joly sailaýda áldebir kandidattyń paidasy úshin sailaýdan shyǵyp qalmaisyz ba?" degen suraǵyna Bázilbaev "shyqpaimyn" dep jaýap berdi.
- Shyqpaimyn. Zańda qozǵalys ne partiia atynan tússeń, sen sheshpeisiń, seni kim, qai partiia túsiredi – solar sheshedi. Sol sebepti meni usynsa, men túsemin, táýekel, - dep jaýap berdi.
67 jastaǵy Jaqsybai Bázilbaev buǵan deiin tórt ret – 1998, 2005, 2011 jáne 2015 jyldary ótken Qazaqstan prezidenti sailaýlaryna ózin-ózi usynǵanymen, saiasi básekeniń sońǵy kezeńine jetpei, óz erkimen shyǵyp ketken.
Qazaqstan prezidenti Qasym-Jomart Toqaev 9 sáýirde Qazaqstandaǵy kezekten tys prezident sailaýy 2019 jyldyń 9 maýsymynda ótetin aitqan.
Qazaqstan prezidentigine úmitkerlerdi jariialaý 10 sáýirde bastaldy. Kandidattardy usyný 28 sáýir 18.00-ge deiin jalǵasady. Úmitkerler 11 mamyrǵa deiin tirkeledi. Sailaýaldy úgit-nasihat tirkeý aiaqtala sala bastalyp, sailaý kúni aiaqtalady
