Foto: Stan.kz
Shymkentte №28349 áskeri bóliminiń injenerlik oq-dáriler qoimasynyń órtenýine kináliler memleketke 23,8 milliard teńge tóleýi kerek, dep habarlaidy "Ult aqparat" Stan.kz aqparat agenttigine silteme jasap.
Shymkent qalalyq azamattyq ister jónindegi aýdanaralyq soty qorǵanys ministrliginiń 4 jaýapkerden 25 093 038 236 teńge materialdyq zalaldy óndirý týraly talaby boiynsha isti qarady. 4 jaýapkerdiń ekeýi – sarbaz.
"2021 jyldyń 26 tamyzynda saǵat 18:40 shamasynda Jambyl oblysy Baizaq aýdany Qainar jol torabynda ornalasqan №28349 áskeri bóliminiń injenerlik oq-dáriler qoimasynyń birinen órt shyǵyp, odan keiin jarylystar bolǵan. Nátijesinde 18 adam qaza taýyp, birneshe adam zardap shekti, sondai-aq memleket pen jeke tulǵalarǵa asa iri mólsherde zalal keltirilgen", – dep málimdedi sot.
Jaýapkerlerdiń kinási 2024 jylǵy 13 naýryzdaǵy zańdy kúshine engen apelliatsiialyq sot aktilerimen dáleldendi.
Jaýapkerler áskeri bólimniń tehnikalyq aýmaǵynda №14 injenerlik oq-dárilerdi saqtaý qoimasynda órt shyǵýyna jol bergendikten, asa iri mólsherde shyǵyn kelgeni anyqtaldy.
Endi olar 23 764 530 881 teńge memleket paidasyna materialdyq shyǵyndy tóleýi kerek.
Dálel bolmaǵandyqtan, qalǵan 1 328 507 355 teńgeni tólemeidi.
Sheshim zańdy kúshine engen joq.
Eske salsaq, buǵan deiin Baizaqtaǵy jarylys boiynsha apelliatsiialyq sot bolyp, sarbazdardy 13 jylǵa bas bostandyǵynan aiyrdy.
