QR Premer-Ministri Asqar Maminniń tóraǵalyǵymen ótken «Báiterek» ulttyq basqarýshy holdingi» AQ direktorlar keńesiniń otyrysynda eki enshiles kompaniiany qaita uiymdastyrý, altynshy obligatsiia baǵdarlamasyn shyǵarý, sondai-aq Holdingtiń basqarma músheleriniń sanyn qysqartý týraly sheshim qabyldandy. Bul týraly "Ult aqparat" primeminister.kz silteme jasap habarlaidy.
QR Prezidenti Qasym-Jomart Toqaevtyń 2019 jylǵy 2 qyrkúiektegi Joldaýynda turǵyn úi baǵdarlamalarynyń operatorlary sanyn qysqartý boiynsha qoiylǵan mindetterdi iske asyrý aiasynda Direktorlar keńesi óziniń enshiles uiymdaryn — «Báiterek development» AQ jáne «Qazaqstandyq Ipoteka Kompaniiasy» IU» AQ qosý týraly sheshim qabyldady. Sonymen qatar, biyl jyl sońyna deiin «Turǵyn úi qurylysyn kepildendirý qory» AQ-ny turǵyn úi qurylysy salasyndaǵy Biryńǵai operator quramyna qosý josparlanǵan.
Otyrys barysynda memlekettik turǵyn úi saiasatyn tiimdi iske asyrýdy qamtamasyz etý úshin altynshy obligatsiia baǵdarlamasyn iske qosý týraly sheshim qabyldandy.
Direktorlar keńesi mashina jasaýdy damytý jobalaryn qarjylandyrý maqsatynda «BRK-Lizing» AQ jarǵylyq kapitalyn 8 mlrd teńgege ulǵaitý úshin Holdingtiń 8 mln qarapaiym aktsiiasyn ornalastyrýdy bekitti.
Otyrysqa qatysýshylar 2019 jyldyń IV toqsany boiynsha «Báiterek» UBH» AQ-nyń táýekelderine qatysty esepti bekitti. Atalǵan kezeńde Holding táýekelderi boiynsha nysanaly deńgei men limitter buzylǵan joq. Qoljetimdi qarjy resýrstarynyń kólemi 571 mlrd teńgeden 595 mlrd teńgege deiin artty, bul negizinen «Báiterek» UBH» AQ-nyń óz kapitalynyń ulǵaiýy esebinen múmkin boldy. Táýekelderdiń basqa túrleri boiynsha aitarlyqtai ózgerister oryn alǵan joq, táýekelder ortasha deńgeide baǵalanyp otyr.
Sondai-aq, otyrysta ishki aýdit qyzmetiniń 2019 jyldyń IV toqsanyndaǵy esebi, 2019 jyldyń qorytyndysy boiynsha 2019-2020 jyldarǵa arnalǵan «Báiterek» UBH» AQ korporativti basqarýdy jetildirý jónindegi is-sharalar josparynyń oryndalý nátijeleri jáne basqa da máseleler qaraldy.
