«Baiqońyr» kesheni jalǵa berilgeli Qazaqstan biýdjetiniń kiris bóligine 2,645 milliard AQSh dollary tústi. Bul týraly QR Premer-Ministriniń «Halyq kommýnisteri» fraktsiiasynyń depýtattyq saýalyna bergen jaýabynda aityldy, dep habarlaidy «QazAqparat» tilshisi.
Saýalda depýtattar Aqai men Tóretam qalalarynyń damý keleshegine, sonymen qatar qazaqstandyq jáne reseilik azamattardyń eńbekaqy sharttarynyń teńquqyqtylyǵyna alańdaýshylyq bildirdi.
Aqai men Tóretam qalalarynyń damýyna qatysty Premer-Ministr atalmysh shaharlarda áleýmettik nysandar men joldar, sý júieleri jóndelip, jańadan salynatynyn habarlady.
Sonymen qatar, Qarmaqshy aýdanynda «Baiqońyr» oiyn-saýyq, týristik aýmaǵyn qurý boiynsha jobany júzege asyrý kózdelgen. Bul joba keleshekte myńdaǵan jańa jumys ornyn ashady dep kútilýde.
Úkimet basshysy teńquqyqty eńbek sharttary týraly jaýap bere kele, Baiqońyrdyń 1995 jylǵy mártebesi týraly kelisimdi eske saldy. Oǵan sáikes, qala turǵyndaryn saiasi nanymyna, násil men ultyna, áleýmettik shyǵý tegi, jynysy, áleýmettik jáne múliktik hal-jaǵdaiyna, tili men dinine qatysty shekteý qoiýǵa jol berilmeidi.
Al eki eldiń 2004 jylǵy bekitilgen kelisimi boiynsha, qazaqstandyq jáne reseilik mamandar, uiymdar «Baiqońyr» ailaǵyndaǵy birlesken jobalardy júzege asyrýda teń sharttar negizinde qatysady. Buǵan qosa reseilik tarappen qarjylandyrylatyn mekemelerde eńbek etetin Baiqońyr qalasynyń turǵyny azamattyǵyna qaramastan Reseidiń zańnamasyna sáikes ailyq alady.
Qazaqstan azamattary jiberilmeitin, Reseidiń memlekettik qupiialarymen bailanysty jumys túrlerinde ǵana ózgeshelik bar.
«Qazaqstan azamattarynyń «Baiqońyr» kesheninde eńbek quqyqtaryna shekteý qoiý jaǵdaiy baiqalmaidy (...) Sonymen birge, «Baiqońyr» kesheninde múddelerdiń zańdylyǵy men quqyǵyn qorǵaý úshin sol qalada turatyn Qazaqstan azamattarynyń ótinimderimen ainalysatyn QR Prezidentiniń arnaiy ókili jumys isteidi», - delingen jaýapta.
