Baiqońyrdan 2017 jyly ushyrylatyn ǵarysh apparattarynyń jospary bekidi

"Soiýz-Ý" zymyran tasyǵyshy Baiqońyr ǵarysh ailaǵynan ushyrylaiyn dep turǵan sát. 29 qarasha 2016 jyl.

Qazaqstan úkimeti Baiqońyr ǵarysh ailaǵynan 2017 jyly ushyrylatyn ǵarysh apparattary men synaq úshin ushyrylatyn zymyran tasyǵyshtarynyń josparyn bekitti, dep habarlady qorǵanys jáne ǵarysh ónerkásibi ministrligi.

Jospar boiynsha, Reseidiń federaldyq ǵarysh baǵdarlamasy aiasynda 2017 jyly Baiqońyrdan reseilik 17 zymyran tasyǵysh, onyń ishinde ekeýi "Resei qorǵanys ministrliginiń paidasy úshin" ushyrylmaq.

Sonymen qatar, kelesi jyly reseilik segiz "Soiýz" zymyran tasyǵyshyn ushyrý josparlanǵan. Olardyń - ǵaryshker basqaratyn tórt "Soiýz MS" kemesi, úsh "Progress MS" ǵaryshtyq júk kemesi jáne qashyqtan zondylaityn "Kanopýs V-IK" spýtnigi.

Jospar boiynsha, kelesi jyly jeti "Proton-M" jáne eki "Zenit" zymyran tasyǵyshtary ushyrylmaq.

Ministrliktiń málimetinshe, 2016 jyly Baiqońyrdan 11 zymyran tasyǵysh ushyrylǵan.