Baiqońyrda turatyn qazaqstandyq azamattardyń endi memleketten tolyq meditsinalyq kómek alýyna múmkindik jasaldy. Buǵan deiin tiisti kómek Resei zańnamasyna sai berilip kelgen edi, dep habarlaidy QazAqparat tilshisi.
Qyzylorda oblystyq Densaýlyq saqtaý basqarmasynyń basshysy Aqmaral Álnazarovanyń aitýynsha, QR Parlamenti Senatynda «2009 jylǵy qarashadaǵy Qazaqstan Respýblikasy Úkimeti men Resei Federatsiiasy Úkimeti arasynda «Baiqońyr» keshenin jalǵa alý jaǵdaiynda ǵarysh ailaǵynyń personalyna, Baiqońyr qalasynyń, Tóretam jáne Aqai kentteriniń turǵyndaryna meditsinalyq qyzmet kórsetý tártibi týraly kelisimge ózgerister engizý týraly hattama» ratifikatsiialandy.
Buryn Baiqońyrdaǵy qazaqstandyq azamattarǵa beriletin meditsinalyq kómektiń erekshelikteri boiynsha el azamattary tegin meditsinalyq kómekti, dárilik zattar men meditsinalyq maqsattaǵy buiymdardy tegin alý, profilaktikalyq meditsinalyq tekserýden ótý zańdy quqyǵy qamtamasyz etilmegen edi. Qoldanysqa engen zańnama tártibi boiynsha endi bul kómekterdi elimizdiń densaýlyq mekemeleri atqara bastady.
Baiqońyrda oblystyq meditsinalyq ortalyǵynyń filialy 2016 jyly ashyldy. Ol qala turǵyndarymen qatar Tóretam jáne Aqai eldi mekenderine, Aral, Qazaly, Qarmaqshy aýdandary turǵyndaryna da qyzmet kórsetedi.
«Búgingi kúni filialda 60 oryndyq terapiia bólimi men 20 oryndyq kúndizgi statsionar turǵyndarǵa em júrgizip keledi. Jergilikti biýdjet tarapynan emhana qajetti qural-jabdyqtarmen qamatamasyz etilgen. Degenmen ázirge bizdiń emhana kórsete almaityn keibir kómekterdi reseilik meditsinalyq uiymdar joldama boiynsha atqarady. Atap aitqanda, Resei tarapynan hirýrgiialyq, infektsiialyq, týberkýlez jáne jedel járdem sekildi kómek túrleri kórsetiledi», - dedi Aqmaral Álnazarova.
Aldaǵy ýaqytta Baiqońyr qalasynyń irgesinde oryn tepken Aqai, Tóretam turǵyndaryn qoljetimdi meditsinalyq kómekpen qamtamasyz etýge mán berilip otyr. Osy maqsatta Tóretam emhanasy men Aqai aýyldyq aýrýhanasyn oblystyq meditsinalyq ortalyǵynyń Baiqońyr filialyna qosý josparlanyp otyr. Eldi mekenderdiń turǵyndary sol maqsatta tirkelip jatyr.
«Aldaǵy jyldyń qańtar aiynan bastap oblystyq medtsinalyq ortalyǵynyń Baiqońyr filialynda kardioreabilitatsiia bólimderi ashylatyn bolady. Odan bólek shaqyrýlarǵa jedel qyzmet kórsetý úshin emhanadan jedel meditsinalyq kómek bólimin ashý josparda tur. Sondai-aq, filialǵa kompiýterlik tomograf satyp alý oilastyrylyp otyr», - dedi A.Álnazarova.
