Baiqońyr ǵarysh ailaǵynan 2019 jyldyń mamyr aiynyń sońynda zymyran ushyrylady. «Proton-M» zymyrany Reseidiń «Iamal-601» spýtniktik bailanysyn ǵaryshqa alyp ushý úshin 24 sáýirde Baiqońyrǵa jetkizildi, dep habarlaidy "Ult aqparat".
«Proton-M» ǵarysh zymyranynyń qurylymdyq bólikteri bar eshelony Máskeýden «Tiýra-Tam» temirjol stantsiiasyna keldi. Zymyran keden protsedýralarynan ótkennen keiin ǵarysh ailaǵy «Proton» ǵarysh zymyran kesheniniń tehnikalyq keshenine jetkizildi. Bul jerde taiaý kúnderi zymyrandy ushyrýǵa daiarlaý boiynsha josparly tehnologiialyq operatsiialar bastalady, dep habarlady Roskosmostyń baspasóz qyzmeti.
«Iamal-601» ǵarysh apparatyn Thales Alenia Space France frantsýz kompaniiasy «Gazprom ǵarysh júiesiniń» tapsyrysymen jasaǵan.
«Proton-M» zymyrany «Briz-M» údemeli blokpen jáne «Iamal-601» ǵarysh apparatymen Resei Federatsiiasynyń teleradio habar taratýdy damytý boiynsha federaldyq maqsatty baǵdarlamasy aiasynda ushyrylady, dep atap ótti Reseidiń ǵarysh vedomstvosynyń baspasóz qyzmeti.
Bekitilgen josparǵa sáikes, «Proton-M» zymyran-tasyǵyshy «Iamal-601» ǵarysh apparatymen birge Baiqońyr ailaǵynan 2019 jyldyń 29 mamyrynda ushyrylady. «Proton-M» zymyrany osy jyly alǵash ret Baiqońyr ǵarysh ailaǵynan ushyrylmaq.
