Reseidiń Vashingtondaǵy elshisi Anatolii Antonov Resei-Amerika qatynasy men AQSh-tyń jańa basshylyǵynyń saiasaty máselesin talqylaý úshin Máskeýge qaitaryldy. Sársenbi kúni AQSh prezidenti Djo Baidenniń suhbaty jariialanǵannan keiin osyndai habar tarady. Suhbatta Baiden Resei prezidenti Vladimir Pýtindi "qanysher" dep sanaisyz ba degen suraqqa "iá" dep jaýap bergen.
Elshini qaitarǵany týraly aqparat Resei syrtqy ister ministrliginiń resmi ókili Mariia Zaharovanyń sársenbi kúni taratqan habarlamasynda aityldy. Onyń sózine qaraǵanda Resei AQSh-pen qatynastyń qaita qalpyna kelmeitin dárejede nasharlamaýyna múddeli.
Aq úidiń baspasóz hatshysy Djennifer Psaki 17 naýryzda Resei óziniń áreketi úshin jaýap beredi dep málimdedi. Buǵan deiin AQSh barlaý qyzmeti arnaiy baiandamasynda Máskeý 2020 jyly AQSh-taǵy prezident sailaýyna aralasty degen tujyrym jasaǵan.
Psakidiń aitýynsha, prezident-demokrat Djo Baiden ákimshiligi burynǵy prezident Donald Trampqa qaraǵanda Reseimen qatynas máselesine basqa qyrynan qaraidy.
Amerika ákimshiligin 20 qańtardan beri basqaryp kele jatqan Baiden ABC telearnasynyń tilshisi Djordj Stefanopýlosqa bergen suhbatynda Resei prezidenti Vladimir Pýtindi "qanisher" dep sanaisyz ba degen suraqqa "iá" dep jaýap bergen.
Suhbatta Máskeýdiń 2020 jyly AQSh-taǵy prezident sailaýyna aralasqany jaily baiandaǵan amerikalyq barlaý qyzmetiniń esebi sóz bolǵan. Baiden eger Reseidiń sailaýǵa aralasqany rastalsa, onyń arty jaqsylyqqa aparmaidy dep Pýtindi eskertkenin alǵa tartqan. Aqparat boiynsha, AQSh kelesi aptada soǵan bailanysty jáne jaqyndaǵy hakerlik shabýyl úshin Reseige sanktsiia salýy múmkin.
17 naýryzda AQSh-tyń Skripaldar otbasy men Aleksei Navalnyidyń "Novichokpen" ýlanýyna bailanysty Reseige sanktsiiany kúsheitkeni belgili boldy. AQSh qorǵanys salasynda qoldanylatyn birqatar ónimder men taýarlar eksportyna tyiym salady.
Resei biligi Skripaldar otbasy men Navalnyidyń ýlanýyna qatysy joǵyn aityp keledi.
