Baianaýyl aýdanynda barymtashylar sottaldy. Olardyń biriniń merzimi politseige qaýip-qater tóndirgeni úshin uzartyldy, dep habarlaidy "Ult aqparat" Pavlodarnews.kz saityna silteme jasap.
Baianaýyl aýdandyq soty baspasóz qyzmetiniń málimeti boiynsha, eki jergilikti turǵyn iri jáne asa iri kólemde urlyq jasaǵany úshin sottaldy. Sondai-aq, olardyń birine bilik ókiline qatysty kúsh qoldandy degen aiyp taǵyldy.
Sot anyqtaǵandai, 2018 jyldyń 3 maýsymynda belgisiz tulǵalarmen aldyn ala sóz bailasý arqyly sottalǵandardyń biri 5,6 mln teńgege 18 jylqy urlaǵan.
Al 2019 jyldyń 5 shildesinde sottalǵandar quny 2,6 mln teńge bolatyn jeti jylqyny urlap ketken.
2019 jyldyń 9 qyrkúieginde 18 jylqyny urlaǵan adam qyzmettik mindetterin atqaryp júrgen politsiia qyzmetkerinen jasyrynýǵa tyrysyp, kúsh qoldaný arqyly pyshaqpen qorqytqan.
Prokýror oǵan qatysty urlyq jasaǵany jáne politsiia qyzmetkerine qaýip tóndirgeni úshin 9 jyl 6 aiǵa bas bostandyǵynan aiyrýdy, al ekinshi mal urlyǵyna qatysty bar adamǵa 3,5 jyl taǵaiyndaýdy surady.
Birinshi sottalýshy kinásin ishinara, al ekinshisi tolyq moiyndady. Ekeýi de ózderin bas bostandyǵynan aiyrmaýdy surady.
- Nátijesinde qylmystyń aýyrlyǵy men birneshe ret jasalǵanyn eskere otyryp, birinshi aiyptalýshyǵa ortasha qaýipsizdik mekemesinde 8 jyl bas bostandyǵynan aiyrý jazasy taǵaiyndaldy. Al ekinshisi jábirlenýshige keltirilgen zalaldy tolyq ótegenin jáne bes balany (olardyń bireýi múgedek) ózi jalǵyz baǵyp otyrǵanyn eskerip, probatsiialyq baqylaýdy belgilei otyryp, 4 jylǵa bas bostandyǵyn shekteý taǵaiyndaldy, - delingen vedomstvo habarlamasynda.
