"Qazaq arýy" qandai bolýy kerek?! Baian Alagózova burymdylar arasynda aýqymdy kasting jariialaǵanymen, aqylyna kórki sai sulýdy tappai ábigerge túsýde. Óitkeni irikteýde qoiylǵan saýaldarǵa mardymdy jaýap joq. Bul týraly NTK arnasyndaǵy "Reviý" baǵdarlamasynda aityldy.
Segizinshi márte uiymdastyrylyp otyrǵan arýlar baiqaýynyń qatysýshylarǵa qoiar talaptary qaz-qalpynda qalǵanymen, dodanyń shekarasy keńeiýde. Iá, osy jyly sulýlar saiysy halyqaralyq deńgeide ótedi. Iaǵni, Baiannyń jobasyna Mońǵoliia, Resei, Túrkiia, Ózbekstan jáne Qyrǵyzstanda turatyn qazaq tildi qyzdar da qatysa alady.
"Bul ideia qatelespesem osydan 5 jyl buryn týyndaǵan bolatyn. Sol kezde, dál osy saiysty halyqaralyq deńgeide ótkizý kerektigin uqtym. Biz Qazaqstandaǵy kasting aiaqtalǵannan keiin, ózge eldegi irikteýdi bastaimyz. Jaqyn kúnderi saparǵa shyǵamyz", — deidi prodiýser Baian Alagózova.
Irikteýge kelgen úmitkerlerge Qazaqstan tarihynan saýaldar qoiylyp, ulttyq salt-dástúrge jáne tanymal tulǵalardyń shyǵarmashylyǵyna sholý jasalady.
"Jeti qazynany" atai almaidy eshqaisysy. Qara sózdiń avtory kim dep suraǵanda, oilanyp qalǵan kezde, "infarkt" bolyp qala jazdaisyń. Sosyn kóbisi ótirik aitady. Meniń eń jek kóretin nársem. Ol kórermenge de birden belgili bolyp turady", — deidi jýrnalist Perizat Myrzahmet.
Osy oraida biz de qatysýshylar arasynda arnaiy saýalnama júrgizip kórdik. Burymdylar 1995 jyldyń 30-shy tamyzynda qabyldanǵan ata zańymyzdan da beihabar bolyp shyqty.
Jyl saiyn 6 shildede Astana kúni toilanatynyn biledi me eken?
Kóp qatysýshy bul kastingtiń birinshi kezeńinde-aq tyǵyryqqa tirelgen. Búginde Baian bastaǵan komanda áli de laiyqty úmitkerlerdi izdestirýde.
