Foto: Akorda.kz
Prezident Qasym-Jomart Toqaev VIII sailanǵan Qazaqstan Parlamentiniń alǵashqy sessiiasynyń ashylýynda sóilegen sózinde bai men kedei arasyndaǵy alshaqtyqty eskertip, Úkimet pen Parlamenttiń aldyna mindet qoidy, - dep habarlaidy "Ult aqparat" Aqordanyń baspasóz qyzmetine silteme jasap.
«Aldymyzda airyqsha mańyzdy mindetter tur. Biz jan-jaqty jańǵyrtý jumysyn kúsheitýimiz qajet. Sondai-aq áleýmettik-ekonomikalyq damý barysyna tyń serpin berýimiz kerek. Elimiz uzaq ýaqyt boiy qolaily syrtqy ahýalǵa arqa súiep keldi. Neshe túrli tujyrymdamalarǵa, baǵdarlamalarǵa sendi.
Atqarylǵan jumys týraly jalǵan esepke senýge májbúr boldy. Alaida asa mańyzdy, ózekti máseleler nazardan tys qaldy. Halyqtyń turmys sapasy áli kúnge deiin jaqsy emes. Quqyqtyq ádiletsizdik beleń aldy. Bai men kedeidiń arasy alshaqtai tústi.
Aldaǵy bes jylda Úkimet jáne Parlament osy negizgi máselelerdiń sheshimin tabýy qajet. Biz elimizdiń beldeýin bekemdep tartýymyz kerek. Ekonomikada jáne áleýmettik salada jyldar boiy jinalyp qalǵan túitkilder bar. Onyń barlyǵyn retke keltirýimiz qajet. Sol úshin jurttyń bárine birdei jaǵa bermeitin, biraq tiimdi ári qajetti sheshimder qabyldaý kerek bolady» - dedi Memleket basshysy.
Osy oraida Prezident naqty basymdyqtar formatynda jumys isteý kerek ekenin aitty.
«Asa mańyzdy máselelerdi dereý sheshý qajet. Biraq keibir máseleni keiinge qaldyrýǵa, al birqatary boiynsha aldaǵy sheshimderdiń tek jobasyn belgileýge týra keledi. Áitpese, eńbegimiz zaia ketedi jáne qolda bar resýrstarymyzdy sarqyp alamyz.
Aldaǵy bes jyl el taǵdyry sheshiletin mańyzdy kezeń bolmaq. Elimizdi qarqyndy damytý úshin sapaly zańnamalyq baza qalyptastyrý kerek. Ol úshin ekonomikaǵa qajetti erejeler men qaǵidalardy ózgertý qajet.
Bul baǵytta alǵashqy qadamdar jasaldy. Monopoliiadan aryltý jáne elimizden zańsyz shyǵarylǵan kapitaldy qaitarý jumystary júrgizilip jatyr. Bul elimizge ornyqty, básekege qabiletti iri biznes kerek emes degendi bildirmeidi. Kerisinshe, qajet ekeni sózsiz jáne biz ony qoldaimyz. Iri biznes bizdiń jańa ekonomikalyq paradigmada jańasha jumys istei bastaidy ári mindetti túrde damidy. Jalpy, ashyq ári ózin-ózi qamtamasyz etetin naryqtyq ekonomika qalyptastyrý basty basymdyq bolyp qala beredi» - dedi Qasym-Jomart Toqaev.
Memleket basshysynyń aitýynsha, shaǵyn jáne orta kásipkerlik ekonomika men eńbek naryǵynyń qozǵaýshy kúshine ainalýǵa tiis.
«Bul jóninde kóp aityldy. Biraq atalǵan baǵytta aitarlyqtai ilgerileý bolǵan joq. Demek, ekonomikalyq saiasatqa ózgeris engizý qajet.
Shaǵyn jáne orta biznesti tolyqqandy qoldaý úshin keshendi sharalar qabyldaý kerek. Olar elimizdi damytýda mańyzdy ról atqaratynyn tolyq sezinýge tiis. Bizge Qazaqstan ekonomikasyn damytý jolynda ózine jaýapkershilik ala alatyn kásipkerlerdiń «jańa tolqyny» qajet. Onyń bel ortasynda ákimshilik resýrstarǵa iek artpai, kásipkerlik talanty men eńbekqorlyǵynyń arqasynda kásibin tabysty júrgize alǵan biznesmender bolýǵa tiis.
Ondai adamdar ár aimaqta bar. Olarǵa elimizde óz biznesin damytýǵa múmkindik berý jáne naqty kómek kórsetý mańyzdy. Qazaqstannyń qazirgi ekonomikalyq modeli, eń aldymen, shikizat sektoryna investitsiia tartýǵa negizdeledi. Sondyqtan ulttyq býrjýaziianyń negizin quraityn orta biznes júiesiz damyp jatyr. Tek jekelegen aimaqtarda ǵana oń qarqyn baiqalady.
Jalpy Úkimetke ekonomikanyń negizgi salalaryna qomaqty investitsiia, sonyń ishinde sheteldik investorlardy tartý mindeti júkteledi. Olar orta biznestiń damýyna tyń serpin berýge tiis. Bul máseleni sozbalańǵa salýǵa bolmaidy» - dedi Prezident Parlament sessiiasynyń ashylýynda.
