Uly Abaidyń 175 jyldyǵyna orai aqyn shyǵarmalarynan úzindi oqý chellendji jalpyhalyqtyq sipat aldy.
Búgin «Nur Otan» partiiasy Tóraǵasynyń Birinshi orynbasary Baýyrjan Baibek danyshpan shyǵarmalarynan úzindi oqý estafetasyn jalǵastyrdy.
Baýyrjan Qydyrǵaliuly estafetany ánshi Móldir Áýelbekovadan qabyldap alyp, ony kórnekti jazýshy Smaǵul Elýbaiǵa, Parlament Májilisindegi «Nur Otan» Fraktsiiasynyń tóraiymy Gúlmira Isimbaevaǵa jáne «Jas Otan» jastar qanatynyń belsendisi Aisulý Erniiazovaǵa joldady.
Baýyrjan Baibek, «Nur Otan» partiiasy Tóraǵasynyń Birinshi orynbasary:
– Abai – qazaq rýhaniiatynyń ainasy, kemel dúnietanymynyń kórinisi. Abai murasy – aqyldyń keni, sarqylmas rýhani qazyna. Uly oishyldyń qai týyndysyn alsańyz da, saliqaly oi, salmaqty tujyrymǵa tunyp tur.
⠀
Uly Abaidyń ósiet etken oi-pikirleri, bizge mura etip qaldyrǵan qara sózderi men óleńderi taǵlymdy mán-maǵynaǵa toly, qazir de ózekti. Olardyń negizgi túiini birlik, eńbek jáne adamgershilik sekildi basty qundylyqtardyń ózeginde toǵysqan. Qashanda eldiktiń bastaýy – birlikte.
⠀
Osyǵan orai meniń tańdaýym hákim Abaidyń «Sáýleń bolsa keýdeńde» óleńine tústi.
⠀
Sáýleń bolsa keýdeńde,
Myna sózge kóńil ból.
Eger sáýleń bolmasa,
Meiliń tiril, meiliń ól.
Kóp shýyldaq ne tabar,
Bilemese bir kemel?
Berekeli bolsa el –
Jaǵasy jailaý ol bir kól.
Japyraǵy jaiqalyp,
Bulǵaqtaidy soqsa jel.
Jan-jaǵynan kúrkirep
Quiyp jatsa aqqan sel,
Onyń maly ózgeden
Ózgeshe bop óser tól.
Berekesi ketken el –
Sýy ashyǵan batpaq kól.
Qus qańqyldap, jaǵalap,
Sýlai almas jazǵy tól.
Onyń sýyn ishken mal
Tyshqaq tiip, aspas bel.
Berekeńdi qashyrma,
El tynysh bolsa, jaqsy sol.
Ras sózge talasyp,
Aqjem bolma, janym, kel!
⠀
Qazaq balasy osy qundylyqtarǵa taban tirep, oiyn da, boiyn da Abaiǵa qarap túzese, adaspaidy. Birligimiz bekem, adamshylyǵymyz kemel, eldigimiz máńgi bolmaq.
