Belarýste byltyrǵy ádildigi daý týdyrǵan prezident sailaýynan keiingi halyq narazylyǵyn biliktiń qatygezdikpen basyp-janshýy sebepti Batys elderi sanktsiialar salyp jatqan osy eldiń avtoritar bileýshisi Aleksandr Lýkashenko "qaýipsizdikti" syltaýratyp, Ýkrainamen shekarany tolyqtai jabý týraly jarlyq shyǵardy. Buǵan qosa ol elde Batyspen bailanysy bar "terroristik" astyrtyn uiymdar áshkerelengenin málimdedi, dep jazady "Ult aqparat".
Memleket táýelsizdiginiń 30 jyldyǵyna arnalǵan jiynda sóilegen sózinde Lýkashenko Belarýs aýmaǵyna "óte kóp mólsherdegi" qarý-jaraqtyń aǵylyp kelýine jol bermeý úshin sheneýnikterge eldiń Ýkrainamen shekarasyn jabýǵa pármen bergenin jariia etti. Ýkraina syrtqy ister ministrliginiń baspasóz hatshysy Ýkrainanyń ózimen kórshi postsovettik eldiń ishki isine aralaspaǵanyn jáne ondai jospary da joǵyn málimdedi. Óz ákimshiligi jariialaǵan sózinde Lýkashenko Belarýste Germaniia, Litva, AQSh, Polsha jáne Ýkrainamen bailanysty "astyrtyn terror uiymdary" áshkerelengenin aitqan.
Lýkashenko esh aiǵaq-dálelsiz aiyptaýyn onyń rejimine Batystyń qosymsha sanktsiialary salynyp jatqan shaqta aityp otyr. Eýropanyń bir elinen ekinshisine ushyp bara jatqan jolaýshylar ushaǵyn májbúrli túrde qondyryp, ondaǵy oppozitsiialyq blogerdi tutqyndaǵannan keiin Batys elderi Minskige qarsy sharalar qabyldaǵan.
Lýkashenko ataǵan elder ázirshe bul aiyptaýǵa bailanysty eshqandai málimdeme jasaǵan joq. Lýkashenko bolsa ózi aitqan "uiymdardyń" maqsaty "eldegi bilik rejimin kúshpen ózgertý" dep otyr.
