Batys Resei ekonomikasyna soqqy jasaidy. Eýrokomissiia tóraǵasy Ýrsýla fon der Liaien jeksenbi kúni túnde Eýropa odaǵy, Ulybritaniia, Kanada jáne AQSh jetekshileri Reseidiń birqatar bankterin SWIFT júiesinen ajyratyp, Resei Ortalyq bankine syrtqy rezervterin alýǵa shekteý qoiý jóninde ýaǵdalasqanyn málimdedi, dep habarlaidy Azattyq.
"Pýtin Ýkrainany joiý jolyna tústi. Biraq ol óz eliniń bolashaǵyn joiatyn bolady", – Eýrokomissiia tóraǵasy.
Shektelgen bankterdiń naqty tizimi keltirilgen joq. Alaida sanktsiia qazir Alfa-Bank, VEB, VTB, "Promsviazbank, "Otkrytiia", "Rossiia", "Rosselhozbank", MKB, "Sovkombankke" jáne anneksiialanǵan Qyrymda jumys isteitin birneshe kredit uiymdaryna salynǵany belgili bolyp otyr.
"Qajet bolsa Reseidiń ózge bankteri de SWIFT júiesinen ajyratylady" dedi Germaniia úkimetiniń resmi ókili Shteffen Hebeshtrait.
"Osylaisha bul institýttar halyqaralyq qarjy aǵynynan oqshaýlanyp, aýqymdy áreket jasaý múmkindikteri shekteledi", - dedi Hebeshtrait.
Aq úi saityndaǵy málimdeme "Reseidiń birneshe bankiniń SWIFT júiesinen ajyratylýy sanktsiiany qataitýdyń jalǵyz joly emes" deidi. Resei úkimetimen qatysy bar biznesmenderdiń investitsiia salǵanyna aiyrbas retinde Batys elderinen azamattyq alýyn da qiyndatýǵa kelisken. Barlyq tarap Reseidiń Ortalyq bankine qarsy sanktsiiany kúsheite túsýge ýaǵdalasqan.
Reseidiń Ortalyq bankiniń 640 milliard dollar rezerviniń basym bóligi Niý-Iork, London jáne Frankfýrt qalalarynda saqtaýly tur.
Resei Ortalyq bankiniń rezervtegi aqshasyna qoly jetpeýi Ortalyq bankti rýbl baǵamyn ustap turý múmkindiginen aiyrady.
Munan ózge Batys memleketteri óz elderindegi reseilikterdiń aktivterin izdestirip, anyqtaýmen shuǵyldanatyn jedel top qurdy. Kelisim jasasqan elder Resei biliginiń mańynda júrgen, sanktsiia salynýǵa tiis laýazymdy adamdar men olardyń otbasylarynyń tizimin meilinshe kóbeite túsýdi josparlap otyr.
SWIFT – tólem júiesi emes. Ony búkil álemniń bankteri aqsha aýdarymy týraly sheshim almasatan, kelisimderdi rastaityn, qarjy qujatttaryn jiberip, qabyldaityn arnaýly messendjer deýge bolady.
SWIFT júiesin álemniń 11 myńnan astam qarjy uiymy paidalanady.
