Búgin Senattyń paralamenttik tyńdaý kezinde depýtat Qýanysh Aitaxanov respýblikalyq mańyzy bar joldar salǵan kezde oblys jáne aýdanaralyq joldardy buzyp ketetin merdigerler týraly QR Investitsiia jáne damý ministri Jeńis Qasymbekke saýal joldady, dep habarlaidy Baq.kz tilshisi.
«Kóptegen jerlerge jańa qurylys, jańa joldar salamyz da oblystardaǵy, aýdandardaǵy jap-jaqsy joldardy búldiremiz. Sol joldarda 40-50 tonnalyq júk kólikteri júredi. Bul joldar ondai júkke eseptelmegen. Sondyqtan ezip jiberedi. Keiinnen qurylys bitedi. Ol joldar sol kúii qalyp ketedi. Ony jóndeýge oblystyq, aýdandyq biýdjetterdiń shamasy jetpeidi. Mundai jaǵdai respýblikada kóptep kezdesedi. Bul másele bolashaqta qalai sheshiledi? Múmkin iri jol salatyn kezde sol joldy paidalaný úshin qarjy bólý kerek shyǵar. Batys Qytai-Batys Eýropa joly salyndy da Jambyl men OQO-nyń barlyq joldaryn búldirip ketti. Al endi ol joldardy qalypqa keltirý úshin qyrýar qarjy kerek. Ony oblystyq biýdjet kótere almaidy. Osyndai máseleler kóp. Kóksarai sý qoimasyn salǵan kezde de osylai boldy. Bul jaǵdaiǵa bailanysty ministrliktiń jospary qandai?» , - dep surady Qýanysh Aitaxanov.
Óz kezeginde QR Investitsiia jáne damý ministri Jeńis Qasymbek mundai máseleniń bar ekenin, ony aldaǵy ýaqytta sheshý úshin jumystar istelip jatqanyn aitty.
«Mundai másele bar. Batys Qytai-Batys Eýropa jolyn salǵanda Jambyl jáne Ońtústik Qazaqstan oblysynda osyndai másele týyndaǵan. Búgingi tańda bul másele sheshilip keledi. Merdiger úlken jol salatyn bolsa, mindetti túrde ainalma jol salý kerek. Ondai múmkindik bolmasa, jergilikti joldy paidanady. Biraq, ol úshin merdiger jergilikti ákimdikke qarjy tóleidi. Biz bul máselelerdi ret-retimen sheship jatyrmyz», -dedi Jeńis Qasymbek.
.jpeg)