Batys Qazaqstan oblysynda politsiia qyzmetkeri vzvod komandirin atyp óltirdi, dep habarlaidy "Ult aqparat".
QR IIM mamandandyrylǵan kúzet qyzmeti basqarmasy Aqjaiyq aýdany 2-batalonynyń qyzmetkeri, 1994 jylǵy politsiia serjanty tabeldik qarýynan osy batalonnyń 1986 jylǵy vzvod komandirine birneshe ret oq atqan. Sonyń saldarynan vzvod komandiri oqiǵa ornynda qaza tapty.
BQO Ishki ister departamentiniń baspasóz qyzmetinen túsken málimetke qaraǵanda, oqiǵa 6 qyrkúiek kúni saǵat 16.30 shamasynda Aqjaiyq aýdany ortalyǵy Chapaev aýylynda aýdandyq ishki ister bóliminiń aýmaǵynda oryn alǵan.
"Qyzmetker óz bastyǵyn – vzvod komandirin atyp óltirdi. Kúdikti ustaldy", — dep habarlady Aqjaiyq aýdanynyń ákimi Ádil Jolamanov.
Oblystyq densaýlyq saqtaý basqarmasynyń habarlaýynsha, qońyraý saǵat 16.32-de túsken, er adam dárigerler jetkenshe kóz jumdy.
Qazirgi kezde sebep-saldary anyqtalyp jatqan oqiǵa ornynda politsiia qyzmetkerleri jumys jasaýda.
"Aqjaiyq aýdany ekinshi batalonynyń politsiia serjanty vzvod komandirine tabeldik qarýdan oq atty", — dep habarlady óńirlik ishki ister departamentinen.
Atalǵan fakti boiynsha qylmystyq kodekstiń "Adam óltirý" baby boiynsha sotqa deiingi tergeý bastaldy.
Video: uralskweek.kz
