Batys Qazaqstan oblysynda koronavirýsqa qarsy ekpe jumystary bastaldy, dep habarlaidy "Ult aqparat".
BQO densaýlyq saqtaý basqarmasynyń basshysy mindetin atqarýshy Arman Qalibekovtiń málim etkenindei, óńirge 1 myń doza reseilik «Spýtnik V» vaktsinasy jetkizildi.
Onyń sózine qaraǵanda, vaktsina keshe Nur-Sultan qalasynan Aqtóbege ushaqpen ákelindi. Odan keiin arnaiy kólikpen búgin tańmen Oralǵa jetkizilgen vaktsina qazirgi kezde oblystyq qan ortalyǵynda tońazytqysh kamerasynda saqtalynýda.
«Birinshi kezekte koronavirýs juqtyrý qaýpi joǵary infektsiialyq statsionarlar, jedel járdem, qabyldaý jáne jansaqtaý bólimderi, emhana, basqa da emdeý mekemeleriniń qyzmetkerleri egiledi», dedi Arman Talǵatuly.
Onyń aitýynsha, jasy 18-ge tolmaǵandarǵa jáne 65-ten asqandarǵa ekpe salynbaidy. Al koronavirýstyń orta jáne aýyr túrimen aýyrǵandar 6, jeńil syrqattanǵandar men simptomy joqtar 2 aidan keiin saldyra alady.
Vaktsina hladoelementteri bar termokonteinerlermen tasymaldanady. Tońazytqyshtan alynǵannan keiin ekpe eki saǵattan artyq ustalmaýy qajet. Ár vaktsinada 3 millimetr doza 5 adamǵa jetedi.
Ekpe 6 qalalyq emhana men meditsina ortalyqtaryndaǵy egý kabinetterinde egiletin adamnyń kelisimimen jasalady. Áýeli dáriger qarap, qyzýyn ólsheidi. Egilgen adam jarty saǵat baqylaýda bolyp, úiine jiberiledi. Onyń halin úsh kún boiy meditsina qyzmetkerleri habarlasyp, bilip otyrady. Alǵash egilgennen keiin 21-inshi kúni ekpeni sol adam qaita alady. Bul joly ekpeniń dozasy kúshtirek bolady. Sóitip koronavirýsqa qarsy antidene qalyptasady.
«Aldyn ala málimet boiynsha 10 aqpanǵa qarai vaktsina taǵy da jetkiziledi. Koronavirýstyń betin qaitarý úshin qolǵa alynǵan asa mańyzdy is-shara osylai jalǵasa beredi», dedi A.Qalibekov.
