BQO-nyń Qaztalov aýdanynda kiik atqan Muradym Aitjanov pen Dáýlet Aitjanov aýdandyq sot úkimimen sottaldy, dep habarlaidy "Ult aqparat".
Qaztalov aýdany politsiia bólimi bastyǵynyń mindetin atqarýshy, politsiia maiory Marlen Qarabaevtyń málim etkenindei, atalǵan turǵyndar QR QK 337-baby 6-bóligi 2-tarmaǵy jáne 339-baby 2-bóligi 2-tarmaǵyna sáikes aiypty dep tanyldy.
M.Aitjanov pen D.Aitjanov múlikterin tárkileýsiz alty jyl alty ai merzimge bas bostandyǵynan aiyryldy. Sondai-aq 10 jyl merzimge ańshylyq qyzmetpen ainalysý quqyǵynan aiyryldy.
Sot talqysynda belgili bolǵanyndai, atalǵan ekeý 12 mamyr kúni saǵat 11.30 shamasynda tirkelmegen, memlekettik nómiri joq «Toyota Land Cruiser-80» markaly avtokóligin paidalanyp, aldyn ala sóz bailasyp, Qaztalov aýdany Qaztalov aýylyna qarasty Bozai-2 qystaǵynyń mańyna barǵan.
Sol jerde M.Aitjanov avtokólikpen kiikterdi qýyp, al D.Aitjanov zańsyz saqtap júrgen IJ-18 EM-M markaly «92117970» 12 kalibrli ańshylyq qarýymen 15 kiiktiń tekesin atqan. Sodan keiin 30 múiizdi kesip alyp, kiik ushasyn sol jerge tastap ketken.
Qylmys ústinde Qaztalov aýdany politsiia bóliminiń qyzmetkerleriniń qolyna túsken olar memleketke 62,505 mln teńge (15 kiiktiń quny) kóleminde materialdyq zalal keltirgen.
Sot úkimine sáikes atalǵan avtokólik tárkilendi, kiik múiizi joiyldy. Sottalýshylardan 62,505 mln teńge memleket paidasyna óndirildi.
Úkim kúshine engen joq.
