Batys Qazaqstan oblysynda karantinge jabylǵan mektepter sany 13-ke jetti, dep habarlaidy "Ult aqparat".
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda málim etkenindei, úshinshi toqsanda 11 qańtardan bastap 167 oqýshy koronavirýs juqtyrsa, sonyń 89-y dástúrli sipatta, 78-i qashyqtan kóshti.
Oblysta 8-12 aqpan aralyǵynda qala men aýdandardyń bas memlekettik sanitar dárigerleriniń qaýlysyna sáikes 13 mektep 14 kúnge karantinge jabylyp, onda oqityn shákirtter qashyqtan bilim alýda.
Al oqý jyly bastalǵannan beri barlyǵy 381 oqýshydan indet tabyldy.
Nurlybek Ermekulynyń sózine qaraǵanda, 1 aqpannan beri 889 adamnyń aýyrǵany anyqtalyp, olarmen qarym-qatynasta bolǵan 1056 adam meditsinalyq baqylaýǵa alyndy.
Sońǵy aptada (5-11 aqpan) aldyńǵy aptamen (29 qańtar – 4 aqpan) salystyrǵanda, derttiń 11 paiyzǵa (613-ten 553-ke) tómendegeni baiqalady.
«Aqpanda syrqattanǵandardyń 259-y (29,1 paiyzy) – jumys isteitin adamdar, 264-i (29,6 paiyzy) – zeinetkerler, 213-i (23,9 paiyzy) – jumyssyzdar, 58-i (6,5 paiyzy) – oqýshylar, 24-i (2,6 paiyzy) – muǵalimder, 29-y (3,4 paiyzy) meditsina qyzmetkerleri bolyp otyr», dedi N.Mustaev.
