Batys Qazaqstan oblysynda eki avtokólik soqtyǵysyp, 9 adam aýrýhanaǵa jetkizildi, dep habarlaidy "Ult aqparat".
BQO politsiia departamentiniń resmi ókili Bolatbek Belgibekovtiń málim etkenindei, oqiǵa 1 aqpan kúni shamamen saǵat 13.00-de Oral-Atyraý joly boiynda boldy.
«Lada Largýs» pen «Datsun» avtokólikteri túiisti.
Politsiia qyzmetkerleri oqiǵa ornyna baryp, anyqtaǵanyndai, «Lada Largýs» avtokóligi qolaisyz aýa raiyna bailanysty joldyń qarsy betine shyǵyp ketken. Sodan «Datsun» avtokóligimen túiisken.
Aqjaiyq aýdandyq ortalyq aýrýhanasynyń direktory Almas Júnisbekovtiń naqtylaýynsha, aýdan ortalyǵy Chapaevtan 30 shaqyrym jerde, Samal aýyly tusynda bolǵan jol apatyna saǵat 13.05-te jedel járdem shaqyryldy.
Avtokólikterde barlyǵy 11 adam bolǵan. Ekeýi dárigerge qaralýdan bas tartty.
«Qalǵan 9-y túrli jaraqattarmen aýdandyq aýrýhanaǵa jetkizildi. Olardyń ishinde 1 jasqa tolmaǵan bala bar. Onyń jaǵdaiy ortasha, bir qalypty, bas miy jeńil túrde shaiqalǵan. Úsh adam jambas, san súiekteri synyǵymen túsken. Bárine alǵashqy meditsinalyq kómek kórsetildi. Oblystyq sanaviatsiiamen travmatolog shaqyrtyldy», dedi A.Júnisbekov.
