Batys Qazaqstan oblysynda bir otbasynan bes adam koronavirýs juqtyrdy, dep habarlaidy "Ult aqparat".
BQO sanitarlyq-epidemiologiialyq baqylaý departamentiniń basshysy Muhamǵali Aryspaevtyń óńirlik kommýnikatsiialar qyzmeti alańynda ótken brifingide málim etkenindei, úi karantininde naýqastardyń ózin-ózi oqshaýlaý talaptaryn saqtamaýyna bailanysty koronavirýs juqtyrý jiilep otyr.
Atap aitqanda, Bórli aýdanynda bir otbasydan – 5, Tasqalada – 4, Terektide 3 adamnan indet tabyldy.
Jeltoqsan aiynda 886 naýqas tirkelse, sonyń 518-i nemese 58,5 paiyzy Oral qalasynyń úlesine tiedi. Sondai-aq Bórli (133, 15 paiyz) jáne Báiterek (103, 11,6 paiyz) aýdandarynda kóp tirkelip otyr.
M.Aryspaevtyń sózine qaraǵanda, óńirde 1-25 jeltoqsan aralyǵynda memlekettik shekaradan 23916 adam ótse, sonyń 4084-i – jolaýshylar. Anyqtamasyz ótken 721 jolaýshynyń tórteýinen koronavirýs anyqtaldy. Halyqaralyq júk tasymalymen ainalysatyn 12048 júrgizýshiniń 4175-inde anyqtama bolǵan joq. Bulardyń toǵyzynan indet tabyldy.
Sol sekildi jeltoqsan aiynda Germaniia men Egipetten 6 halyqaralyq áýe reisi jáne Máskeýden bir charterlik reis keldi. 483 jolaýshynyń ishinde anyqtamasy bolmaǵan 79-y karantindik statsionarǵa ornalastyrylyp, synama alyndy. Olardyń bári de saý bolyp shyqty.
Osy aida óńirde barlyǵy 38971 adam zerthanalyq tekserýden ótti. Al indet bastalǵaly 248129 adamnan synama alyndy. Kúni búgin oblys PTR diagnostikasy úshin 63837 zertteýge arnalǵan 1276 test júiesimen qamtamasyz etilgen.
«Jeltoqsan aiynda monitoringtik toptar 176 nysanda sanitarlyq talaptyń buzylǵanyn anyqtady. QR Ákimshilik quqyqbuzýshylyq kodeksi 425-baby 1-bóligine sáikes 87 hattama (sonyń ishinde 20-sy – kóp adamnyń qatysýymen ótken is-sharalar) toltyrylyp, 5 mln astam teńge kóleminde aiyppul salyndy. Bul baǵyttaǵy jumystardyń jalǵasyp jatqanyn eske sala otyryp, oblys turǵyndarynan jańajyldyq mereke kúnderi sanitarlyq talapty saqtaýdy ótinemiz», dedi M.Aryspaev.
