Batys Qazaqstan oblysynda bir kompaniianyń 47 qyzmetkerinen koronavirýs tabyldy, dep habarlaidy "Ult aqparat".
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda málim etkenindei, Bórli aýdanynda Bonatti S.P.A. kompaniiasy qazaqstandyq filialy qyzmetkerleri arasynda vahtalyq aýysymnan shyǵý aldyndaǵy skrining kezinde 47 adamnan simptomsyz indet anyqtaldy.
Bórli aýdanynda biylǵy jyl basynan beri aýyrǵandar sany 100-ge jetken.
Osyǵan orai Bórli aýdany bas memlekettik sanitar dárigeriniń 13 qańtardaǵy qaýlysymen shekteý sharalary kúsheitildi. Atap aitqanda, qoǵamdyq tamaqtandyrý jáne basqa kópshilik oryndarda sanitarlyq-dezinfektsiialyq rejimniń saqtalýyn baqylaý kúsheitilip, memlekettik organdar qyzmetkerleriniń 80 paiyzy qashyqtan jumys isteýge kóshirildi.
Sol sekildi Jánibek aýdany Borsy aýyldyq okrýginde 8 adam indet juqtyrǵan. Sondyqtan koronavirýs juqpasyn odan ári taratpaý maqsatynda Borsy aýylynda karantindik shekteý sharalary kúsheitilip, blokpost qoiyldy.
Sondai-aq Oral qalasynda 1 balabaqsha tárbielenýshisiniń koronavirýs juqtyrǵany tirkeldi. Oral qalasy bas memlekettik sanitar dárigeri mindetin atqarýshynyń qaýlysymen karantin belgilenip, balabaqsha tobynyń qyzmeti toqtatyldy. Bailanysta bolǵan 18 adam (15 tárbielenýshi men 3 balabaqsha qyzmetkeri) meditsinalyq baqylaýǵa alyndy.
Nurlybek Ermekulynyń sózine qaraǵanda, jyl basynan beri óńirde 572 adamnyń syrqattanǵany anyqtaldy. 1 qańtardan bastap oblys boiynsha barlyǵy 24645 PTR zertteý júrgizildi, ortasha eseppen táýligine 3400-ge deiin zertteý júrgiziledi. Zerthanalardyń qýattylyǵy táýligine 6000 zertteýge deiin jetedi.
«Qańtar aiynda memlekettik shekaradan barlyǵy 6882 adam ótti. 2079 jolaýshynyń 227-sinde anyqtama bolǵan joq. 214 adam karantindik statsionarǵa jatqyzylyp, ekeýinen indet tabyldy. Halyqaralyq júk tasymalymen ainalysatyn 3015 júrgizýshiniń anyqtamasy joq 995-inen alynǵan synama koronavirýs joqtyǵyn kórsetti», dedi N.Mustaev.
