Batys Qazaqstan oblysynda aýyl mektebine sý kirip ketti, dep habarlaidy QazAqparat.
Qaratóbe aýdanynyń ákimi Qadyrjan Súieýǵalievtiń aitýynsha, oqiǵa 28 naýryz kúni tańmen Qoskól aýyldyq okrýgine qarasty Shalǵyn ortalaý mektebinde boldy.
Shalǵyn – Qoskólden 25, aýdan ortalyǵy Qaratóbeden 100 shaqyrym qashyqtyqta ornalasqan shaǵyn eldi meken. Munda 45 aýla, 196 turǵyn bar.
Aýdan basshysynyń sózine qaraǵanda, ortalaý mekteptiń bir ǵimaraty 1967, ekinshisi 1987 jyly salynǵan. Keiin aýyl turǵyndary óz kúshterimen ekinshi ǵimaratqa japsarlas qosymsha qurylys salǵan. Sońǵy kezde qardyń kúrt erýi ári jańbyr jaýýy saldarynan, irgetasy tómen boldy ma, osy qosymsha ǵimaratqa sý kirip, peshteri qulap, basqa da zaqym keldi.
Qumait jerde ornalasqandyqtan, buryn Shalǵynda mundai oqiǵa bolyp kórmegen edi.
«Mektep ǵimaratyna keshe de qaýip tóndi. Degenmen TJ, jergilikti atqarýshy organdar jáne aýyl turǵyndarynyń jumylýy nátijesinde tasqynǵa tosqaýyl qoiyldy. Atalmysh mektepte 37 shákirt bilim alady. Búgin olar basqa ǵimarattarda oqyp jatyr. Oqiǵaǵa bailanysty arnaiy komissiia qurylyp, jumys istep jatyr», - dedi Súieýǵaliev.
