Batys Qazaqstan oblysynda oqýshylardyń ata-analary qashyqtyqtan oqý úshin berilgen planshetterdi lombardqa ótkizgen. Osy fakti boiynsha qylmystyq is qozǵaldy, dep jazdy Sputnik Qazaqstan "Moi gorod" basylymyna silteme jasap.
Oblystyq bilim basqarmasynyń damý ortalyǵy direktorynyń orynbasary Ardaq Erkamesheva 2020-2021 oqý jylynyń basynda oqýshylardyń bilim alýyna arnalǵan 14 970 noýtbýk pen planshet satyp alý úshin respýblikalyq biýdjetten 2 milliard teńge (4,6 million dollar) bólingenin habarlady.
"Bas sanitar dáriger engizgen shekteýlermen jyl sońynda barlyǵy 380 bilim berý mekemesiniń 100 mektebinde oqýshylar qashyqtyqtan bilim aldy. Oqýshylarǵa 7 223 noýtbýk pen planshet berildi. 25 mamyrǵa qarai atalǵan tehnika tolyq qaitaryldy, biraq 83-i jumys isteýge jaramsyz kúide boldy", - dedi Ardaq Erkamesheva.
Onyń aitýynsha, tehnikany tabystaý kezinde mektep pen ata-ananyń arasynda kelisimshart jasalyp, oǵan sáikes planshet pen noýtbýkke ata-ana jaýapty bolady. Eger tehnika isten shyqsa, onda ata-ana tehnikalyq sipattamasy eski nusqamen birdei jańa tehnikany mektepke qaitarýy kerek.
Aita ketsek, kóp jaǵdaida planshetke zaqym kelgen: balanyń abaisyzdyǵyna bailanysty tehnika qoldan túsken nemese oǵan sý tógilgen. Planshet órt kezinde janyp ketken jaǵdai da tirkelgen.
"Jaǵdaiy tómen otbasyndaǵy ata-analardyń planshetti lombardqa ótkizgeni de anyqtaldy. Mundai faktiler boiynsha qylmystyq is qozǵaldy, sot tártibimen keltirilgen shyǵyn kólemi óteldi", - dedi Ardaq Erkamesheva.
Eske sala keteiik, Soltústik Qazaqstan oblysyndaǵy ákimdik qyzmetkerleri pandemiia kezinde quny 12 million teńge (28 myń dollar) bolatyn noýtbýkterdi qoldy etti degen kúdikke ilindi. Ol noýtbýkter turmysy tómen otbasyndaǵy balalardyń qashyqtyqtan oqýy úshin biýdjet qarajatyna satyp alynǵan bolatyn.
