Batys Qazaqstan oblysynda tórt júkti áiel koronavirýs indetin juqtyrǵan, dep habarlaidy "Ult aqparat".
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnikatsiialar qyzmeti alańynda ótken brifingte málim etkendei, qazirgi tańda olardyń ekeýi oblystyq juqpaly aýrýlar aýrýhanasynda emdelýde.
Qalǵan ekeýi dárigerlerdiń baqylaýynda.
Sondai-aq indet oqýshylar arasynda da tirkelip otyr. 12 balanyń tórteýi qyrkúiekte, qalǵan 8-i qazan aiynda otbasy múshelerinen juqtyrǵan. Onyń beseýi jazylyp shyqty, jeteýinde aýrý belgilerinsiz ótýde.
Basqarma basshysy orynbasarynyń sózine qaraǵanda, kúni búginge deiin oblysta 7064 adamnan koronavirýs tabylsa, sonyń 6846-sy emdelip shyqty. 121 adam kóz jumdy.
Pnevmoniiaǵa shaldyqqan 139 naýqastyń 92-si statsionarda, 47-si ambýlatorlyq em alýda.
Oblysta 185 tósektik tórt karantindik statsionarda 41 adam bolsa, 333 tósektik alty juqpaly aýrýlar statsionarynda 103 adam emdelýde. 26 tósektik jansaqtaý bóliminde 7 adam jatyr. Ottegi kontsentratoryna 2 adam qosylǵan.
«2044 tósektik rezervtik oryndar ázirlense, sonyń 1269-y juqpaly aýrýlar, 775-i karantindik statsionarda. Oǵan qosa «Juldyz» shaǵynaýdanynda quny 7,2 mlrd teńgeni quraityn, 200 tósektik modýldik aýrýhana qurylysy júrgizilýde. Qazirgi tańda jumystyń 85 paiyzy oryndalǵan. Osy aidyń aiaǵynda paidalanýǵa berý kózdelýde. Oblystyq juqpaly aýrýlar aýrýhanasynan ereksheligi, onda kompiýterlik tomografiia bolady. Diagnostika da júrgiziledi. Qajetti qural-jabdyqtar ornatylyp, kadrlar da iriktelýde», dedi G.Ábdirahmanova.
