Oralda qazaq kúresinen Qazaqstannyń Tuńǵysh Prezidenti Nursultan Nazarbaevtyń júldesi úshin «Qazaqstan barysy» týrniriniń oblystyq irikteý saiysy márege jetti, dep habarlaidy "Ult aqparat".
Dástúrli jarysqa oblys aýdandary men Oral qalasynan barlyǵy 13 balýan qatysyp, baq synady.
Finalda Bórli aýdanynyń ókili Temirlan Kólbai kaztalovtyq Bekaidar Meńdeshevti taza utty.
Úshinshi oryn beldesýde báiterektik Erlan Musaǵaliev jaraqatyna bailanysty kilemge shyqpai qaldy da, jeńis qarsylasy, jańaqalalyq Erasyl Ahmetovke berildi.
Biylǵy erekshelik, jeńimpazǵa «Jaiyq barysy» beldigi tabys etildi.
Sondai-aq chempionǵa - 150 myń, ekinshi oryn iegerine - 100 myń, úzdik úshtikti túiindegen balýanǵa 50 myń teńge aqshalai syilyq tapsyryldy.
«Qazaqstan barysy» respýblikalyq týrnirinde T.Kólbai men B.Meńdeshev oblys namysyn qorǵaityn bolady.
Jarysqa qazaq kúresi oblystyq federatsiiasynyń vitse-prezidenti Áset Sultanuly demeýshilik kórsetti.
Jalpy, ol qazaq kúresinen aldy respýblikalyq deńgeide júlde alyp júrgen balýandarǵa únemi qolushyn berip keledi.
Jarys Jáńgir han atyndaǵy Batys Qazaqstan agrarlyq-tehnikalyq ýniversitetiniń (rektory Asqar Nametov) jańadan salynǵan, ádemi bezendirilgen sport kesheninde ótti.
