Foto: Oqý-aǵartý ministrligi
Qazaqstan Respýblikasynyń Oqý-aǵartý ministri Ǵani Beisembaev 100 jyldan astam ýaqyt shákirt tárbielep kele jatqan mektepterdiń pedagogikalyq ujymdarymen onlain formatta kezdesip, suhbattasty, dep habarlaidy Ult.kz Ministrliktiń baspasóz qyzmetine silteme jasap.
Elimizde óz qyzmetin 19-20 ǵasyrlarda bastap, búgingi kúnge deiin aǵartýshylyq dástúrdiń sabaqtastyǵyn úzbei kele jatqan 97 mektep, 12 kolledj bar.
Máselen, Batys Qazaqstan oblysyndaǵy Jáńgir han mektebi 184 jyldan beri úzdiksiz bala oqytyp keledi. 1841 jyly Qazaqstan aýmaǵyndaǵy alǵashqy bastaýysh mektep bolyp ashylǵan bul qarashańyraqta tuńǵysh qazaq ǵalymdarynyń biri Muhammed-Salyq Babajanov, aǵartýshy Maqash Bekmuhambetov, sondai-aq «Muǵalim» jýrnalynyń alǵashqy redaktory Ǵumar Qarash siiaqty tulǵalar bilim alǵan.
Foto: Oqý-aǵartý ministrligi
Qyzylorda oblysyndaǵy 164 jyldyq tarihy bar №16 mektep-litsei, Aqtóbe oblysyndaǵy 162 jyldyq tarihy bar Y.Altynsarin atyndaǵy orta mektep, Atyraý oblysyndaǵy 144 jyldyq tarihy bar Qyzylúi orta mektebi — ulttyq bilim berý dástúriniń altyn arqaýyn jalǵastyryp kele jatqan bilim ordalary. Aqmola oblysyndaǵy Joǵary orman sharýashylyǵy, ekologiia jáne týrizm kolledji 129 jyldan beri elimizdiń ekonomikasyn nyǵaitýǵa úles qosqan kásibi mamandar daiarlap keledi.
Foto: Oqý-aǵartý ministrligi
Kezdesý barysynda ministr ult rýhaniiatynyń kieli shańyraǵyna ainalǵan bilim oshaqtarynyń árqaisysynyń elimizdiń tarihy úshin ǵana emes, bolashaǵy úshin de róli erekshe ekenin atap ótip, olardy saqtaý jáne jańǵyrtý baǵytynda birqatar tapsyrmalar berdi.
«Qazaq dalasynda aǵartýshylyqtyń qalyptasýy men damýy ondaǵan ǵasyrlardan bastaý alady. Óńirlerdiń qoldaýynyń arqasynda ǵasyrdan astam tarihy bar mektepter jabylmai, bilim shyraǵyn sóndirmei, sabaqtastyqty saqtap keledi. Biz ǵasyrlyq tarihy bar bilim oshaqtarynyń arnaiy katalogyn jasaýdy qolǵa alýymyz kerek. Bul — elimizdiń bilim tarihynyń tereńdigin dáleldeitin mańyzdy qujat bolmaq. Sonymen qatar, Memleket basshysynyń tapsyrmasyna sáikes, bul mektepter de qajettiligine qarai tolyqtai renovatsiiadan ótip, materialdyq-tehnikalyq turǵyda jańartylýy tiis. Sondai-aq munda eńbek etip júrgen pedagogterdiń áleýeti de jiti zerdelenip, olarǵa júieli qoldaý kórsetilýi qajet», — dedi Ǵani Beisembaev.
Ministr júz jyldan astam ýaqyt urpaq tárbielep kele jatqan mektepterdiń tájiribesin zerttep, úzdikterin el kóleminde taratý qajet ekenin atap ótti. Sonymen qatar ol ǵasyrlyq mektepterdi bilim berý isiniń qundylyǵy retinde saqtap qalý jáne damytý maqsatynda 100 jyldyq mektepter qaýymdastyǵyn qurýdy, olardy qoldaý men damytýdyń strategiiasyn ázirleýdi tapsyrdy.
