Batys Qazaqstan oblysynda 1 mamyr kúni saǵat 00.00-den bastap 21 blokpost jumys jasaityn bolady. Bul týraly oblys ákimi Ǵali Esqalievtiń tóraǵalyq etýimen ótken óńirlik jedel shtab otyrysynda BQO politsiia departamentiniń bastyǵy, politsiia general-maiory Maqsothan Ablazimov málim etti, dep habarlaidy "Ult aqparat".
Onyń aitýynsha, BQO bas memlekettik sanitar dárigeriniń 26 sáýirdegi qaýlysyna sáikes 21 blokpostyń jeteýi oblys ortalyǵynda, 14-i aýdandarda ornatylyp jatyr.
Sonyń ishinde Aqjaiyq, Báiterek, Bórli, Qaztalov, Terekti jáne Shyńǵyrlaý aýdandarynda 2-3 blokpostan qoiylmaqshy.
«Barlyq blokpostarda modýldar ornatylyp, qajetti qural-jabdyqtarmen qamtylady. Ár bekette politsiia departamenti basshylyǵy sapynan jaýapty adam bekitildi. Olar beket jumysyn uiymdastyryp, basshylyq etetin bolady.
Blokpostarda eki aýysymda 143 politsiia qyzmetkeri jumys jasaidy, 21 qyzmettik avtokólik bólindi. Sonyń ishinde 68-i – Oral qalasy politsiia basqarmasynyń qyzmetkerleri. 7 kólik osy basqarmaǵa tiesili», dedi M.Ablazimov.
BQO sanitarlyq-epidemiologiialyq baqylaý departamentiniń basshysy Muhamǵali Aryspaevtyń málim etkenindei, oblysta sońǵy sáýir aiynda indet órship ketkendikten, karantindik sharalar kúsheitilip otyr.
Onyń sózine qaraǵanda, Reseidiń 83 óńirinde sońǵy táýlikte 9284 adamnan koronavirýs anyqtaldy. Sonyń ishinde Batys Qazaqstanmen kórshiles Samara oblysynda – 176, Saratovta – 130, Orynborda – 67, Volgogradta 45 adamnan indet tabyldy. Epidemiologiialyq jaǵdai turaqsyz bolǵandyqtan, bul elde ishki lokdaýn jalǵasýda.
«Úndistanda koronavirýstyń órshýi búkil dúnie júzin alańdatyp otyr. Sońǵy táýlikte bul elde 379 myńnan astam turǵynnyń aýyrǵany tirkeldi. Iaǵni bizdegi bir qalanyń halqymen teń deýge bolady. Jalpy, indet juqtyrǵandar sany 18,3 millionnan asty. Bir táýlikte 3645 adam kóz jumdy. Úndistandyq shtamnyń ereksheligi óte tez taralatyndyǵynda. Sondyqtan osyndai jaǵdaiǵa jol bermes úshin shekteý sharalaryn qatańdatyp otyrmyz», dedi M.Aryspaev.
«1 mamyrdan bastap karantindik sharalardy kúsheitýdegi maqsat – indettiń órshýin boldyrmaý. Osyny turǵyndar da túsinip, sanitarlyq talaptardy saqtaýy qajet. Oblysta ótken jyly indet órshigen shilde aiynda kúnine 120-130 adamnan koronavirýs anyqtalsa, qazir 180-200-ge deiin jetip otyr. Sondyqtan barlyq saqtyq sharalaryn alýǵa tiistimiz», dedi oblys ákimi Ǵali Esqaliev.
