Batys Qazaqstan oblysynyń ákimi Ǵali Esqaliev koronavirýsqa bailanysty Reseimen shekarany jabý týraly usynysqa túsinikteme berdi, dep habarlaidy "Ult aqparat" aimaq basshysynyń áleýmettik jelidegi paraqshasyna silteme jasap.
Ol óńirge COVID-19 diagnozymen kelgenderdiń kópshiligi Qazaqstan azamattary ekenin habarlady.
"Sońǵy kúnderi bizdiń oblysta koronavirýs anyqtalǵan adamdardyń sany kúrt ósti. Olardyń 92% -i bizge Resei Federatsiiasynan, negizinen Máskeýden kelgen adamdar. Halyq arasynda shekarany jabý týraly usynys aitylyp jatyr. Osyǵan bailanysty jaǵdaidy túsindire keteiin. Olardyń barlyǵy derlik bizdiń eldiń azamattary, eń aldymen, bizdiń oblystyń turǵyndary. Olardy qabyldap, emdeý – bizdiń mindetimiz", - dep málimdedi Esqaliev.
Reseiden kelgen azamattar dereý shekaradaǵy ótkizý beketinen karantindik statsionarǵa jetkiziledi, iaǵni olar eldi mekenderge kirmeidi, dep jalǵastyrdy ol.
"Sondai-aq, tranzittik júk kóliginiń tórt júrgizýshisi bar. Qazirgi ýaqytta Qazaqstanǵa júk nemese tranzittik júkterdi ákeletinderdi qospaǵanda, shetel azamattaryna Qazaqstanǵa kirýge tyiym salynǵan. Eger júk ákelýdi toqtatsaq, onda taýar tapshylyǵy paida bolyp, baǵa ósedi", - dep jazdy ákim.
Barlyq tranzittik kólik belgili bir janarmai quiý beketterine toqtaidy, dep naqtylady ol.
"Olarǵa oblystyń basqa jerlerinde toqtaýǵa tyiym salynǵan. Kólikter qaladan patrýldik politseilerdiń baqylaýymen shyǵarylady", - dep túsindirdi Esqaliev.
Ol barlyq naýqasqa tez saýyǵyp ketýin tiledi.
Dúisenbi, 20 sáýirde Batys Qazaqstan oblysynda 16 adamnan koronavirýs infektsiiasy anyqtaldy. Olardyń barlyǵy Reseide vahtalyq ádispen jumys istegen.
