Marqum Batyrhan Shúkenovtiń jeke kýáligin satpaq bolǵan azamat qoǵamdyq rezonanstyń týyndaýyna bailanysty ony joiyp jibergen. Bul jaiynda QR Ishki ister ministrligi Memlekettik til jáne aqparat departamentiniń direktory Almas Sadýbaev aitty, dep habarlaidy QazAqparat.
Onyń atap ótýinshe, Batyrhan Shúkenovtiń jeke kýáligin satýǵa qoiý faktisi boiynsha QR Qylmystyq kodeksiniń 383-baby (Resmi qujattar men memlekettik nagradalardy satyp alý nemese satý) boiynsha sotqa deiingi tergeý amaldary júrgizilýde. Qujatty satpaq bolǵan azamat tabyldy.
«Satýshynyń aitýynsha, ol jeke kýálikti taýyp alyp, osy ýaqytqa deiin saqtap kelgen. Keiinnen satýǵa shyǵarǵan. Alaida qoǵamdyq rezonanstyń týýyna jáne halyqtyń tarabynan onyń is-áreketin aiyptaýlardyń artýyna bailanysty jeke kýálikti joiyp jibergen. Istiń mán-jaiy anyqtalý ústinde. Óziniń de, týǵan-týystarynyń da tólqujat ústeli jumysyna eshqandai qatysy joq», - dedi Almas Sadýbaev.
Esterińizge sala ketsek, 16 qazanda OLX saitynda Batyrhan Shúkenovtiń jeke kýáligi satylymǵa shyǵaryldy. Qujatty saýdaǵa salǵan Anýar esimdi almatylyq ánshiniń qoly qoiylǵan jeke kýáligine 1 myń dollar suraǵan bolatyn.
Osydan keiin QR Ishki ister ministrligi Memlekettik til jáne aqparat departamentiniń direktory Almas Sadýbaev Internette marqum ánshi Batyrhan Shúkenovtiń jeke kýáliginiń satylymǵa shyǵarylýyna bailanysty pikir bildirip, málimetter bazasynda B.Shúkenovtiń qujaty joiylǵandyǵy týraly málimet joq ekendigin aitqan edi. Sonymen qatar ol tergeýge jatatyn material QR Memlekettik qyzmet jáne jemqorlyqqa qarsy is-qimyl agenttiginiń Almaty qalalyq departamentine jiberilgendigin atap ótken-di.
