Foto: Tengrinews.kz
Bas áskeri prokýratýra Astanada qaza tapqan 21 jastaǵy Ulttyq ulan sarbazy Qaisar Sultanovtyń isi boiynsha tergeýdiń barysy týraly habarlady. Buǵan deiin saraptama nátijesinde onyń basynan eki oq tigeni anyqtalǵan edi, dep jazady Ult.kz Tengrinews.kz saityna silteme jasap.
Qaisar Sultanov Astanadaǵy №6636 áskeri bóliminde qyzmet etken. Ol 2023 jyldyń 9 qazanynan 10-yna qaraǵan túni kóz jumǵan. Odan bir kún buryn anasy Saýle Tleýbergenova ulyn demalys kezinde kórip, eshqandai kúmán týdyrarlyq jaǵdai baiqamaǵanyn aitady.
Marqumnyń anasynyń aitýynsha, qylmystyq is úsh ret «qylmys quramynyń bolmaýyna bailanysty» jabylǵan. Qazir is QR Qylmystyq kodeksiniń 105-baby («Ózin-ózi óltirýge itermeleý») boiynsha qaita tergelip jatyr. Alaida Saýle Tleýbergenova balasynyń óz-ózine qol salmaǵanyna, ony óltirip ketkenine senimdi. Onyń pikirinshe, bul iske qatysy bar adamdar áli de Ulttyq ulan qatarynda qyzmet etip júr.
Prokýratýranyń resmi jaýaby
Bas áskeri prokýratýra redaktsiia saýalyna bergen jaýabynda:
«Qazir Ortalyq óńirlik áskeri-tergeý basqarmasy áskeri qyzmetshiniń ólimine qatysty sotqa deiingi tergeý júrgizip jatyr. Tergeý aiasynda keshendi jedel jáne tergeý sharalary júrgizilýde, sot saraptamasy taǵaiyndaldy», — dep málimdedi.
Alaida vedomstvo ózge derekterdi jariia etýden bas tartty. Sebebi Qylmystyq-protsessýaldyq kodekstiń 201-babyna sáikes, sotqa deiingi tergeý derekterin jariialaýǵa tyiym salynǵan.
«Basynan eki ret atylyp, sýitsid dedi»
Saraptama qorytyndysyna sáikes, Qaisar Sultanovtyń denesinen eki oq jaraqaty tabylǵan.
«Sarapshylardyń aitýynsha, alǵashqy oq tómennen joǵary baǵytta atylǵan, jaraqat — bas súiegine jáne mańdai bóligine tigen. Al qorytyndyda kórsetilgendei, ekinshi oq alty minýttan keiin atylǵan. Biraq birinshi jaraqattan keiin Qaisar sanaly áreket jasai almaityn jaǵdaida bolǵan», — deidi marqumnyń anasy.
Onyń sózinshe, tergeýshiler beinebaqylaý kameralarynyń jazbalaryn ýaqytyly tárkilemei, keiin qol jetkizgende birqatar faildar joiylyp ketken. Sondai-aq oq atylǵan qarýdan saýsaq izderi alynbaǵan.
Anasy ulynyń áskeri bólimde qarý urlyǵyna kýá bolǵan bolýy múmkin ekenin, sol sebepti kózin joiǵan degen boljam aitady. Sultanovtar otbasy isti «Adam óltirý» babyna qaita saralap, beinematerialdardy joiý men dálelderdi jasyrýǵa qatysy bar barlyq adamdardy jaýapqa tartýdy talap etýde.
