Ninety One toby Zamandas podkasyna qatysyp, Túrkistandaǵy kontserttiń nege bolmai qalǵanyn túsindirip berdi, - dep habarlaidy Tengrinews.kz.
"Negizi, búgin biz Túrkistanda kontsert qoiatyn bolǵanbyz. Odan bólek, oblystyq kitaphanada jastarmen kezdesý josparda boldy. Degenmen, keshe bizge menedjerimiz habarlasyp, Túrkistandaǵy kontserttiń bolmaitynyn habarlady. Sebebin surasaq, sondaǵy halyq ákimdikke shyǵyp, bizdi kelmesin dep ótinish bildirgen eken", - deidi top músheleri.
Qazaqstandyq boizbend Túrkistandaǵy halyqtyń narazylyǵyn ózderiniń syrtqy imidjimen bailanystyrady.
"Sol baiaǵy jyr. 2015 jyly bastalǵan áńgimege qaita oralyp otyrmyz. Shashtary boialǵan, syrǵa taqqan jigitterge sahnadan oryn bergileri kelmeidi. Bul birinshi ret bolǵan jaǵdai emes, etimiz úirendi. Biz kontsertti kez kelgen jaǵdaida abyroimen ótkizetin edik, biraq uiymdastyrýshylar mundai jaýapkershilikti moiyndaryna alǵysy kelmedi. Sebebi bul jerde jai ǵana narazylyq bolǵan joq, shaǵymdanǵandar kóteriliske shyǵatynyn, tipti, basymyzdy kesip alýdan taiynbaitynyn jetkizgen, - deidi Ninety One jigitteri.
Aita keteiik, 28 mamyrda Túrkistanda Ninety One tobynyń kontserti ótýi kerek bolǵan. Alaida, jergilikti turǵyndar Jeli arqyly toptyń kontsert qoiýyna qarsylyq bildirdi. Kópshilik olardyń rýhani astanada óner kórsetýi durys emes degen mazmunda pikir jazǵan.
Bul jaǵdaiǵa qatysty uiymdastyrýshylar da pikir bildirgen edi.
"Túrkistan qalasynyń ákimdigi turǵyndar narazylyǵyn eskere otyryp, sharany uiymdastyrýshy "Kerýen sarai" týristik kesheniniń basshylyǵyna kontsertti ótkizbeý jóninde usynys joldady. Keshen ákimshiligi bul ánshilermen kelisimdi buzdy", - dep habarlady uiymdastyrýshy kompaniia.
