Foto: Ashyq derekkóz
Bokstan Pekin Olimpiadasynyń qola júldegeri, álem birinshilikteriniń kúmis jáne qola júldegeri Erkebulan Shynaliev óz ómirine qaýip tóngenin aityp, quqyq qorǵaý organdaryna júgindi, dep habarlaidy Ult.kz.
Ol Qazaqstan politsiiasy men prokýratýrasynan qorǵan surap otyr.
Sportshynyń málimdeýinshe, 2025 jyldyń mamyrynda ózin Qazaqstan azamattary retinde tanystyrǵan eki adam Túrkiianyń Stambul qalasyna bapker retinde jumys isteýge shaqyrǵan. Aitýynsha, sol sapardan keiin kúmándi jaǵdailar bastalǵan.
«Stambulǵa barǵanda sol azamattardyń úiinde on kúndei turdym, ekeýine bapker bolyp, jattyǵýlar jasadyq. Elge oralǵannan keiin Shyńǵys Muqashev qaita habarlasyp, bir-eki azamattyń aiaq-qolyn syndyrý kerektigin aitty. Men úzildi-kesildi bas tarttym», – deidi tanymal boksshy.
Birshama ýaqyt ótken soń Erkebulan Shynalievke Túrkiiadan qaitadan habarlasqan.
«Biyl qańtar aiynda olar taǵy habarlasyp, Túrkiiaǵa taǵy shaqyrdy. Ári bapker bolasyń, ári jańa josparlar bar dedi. Men barǵan soń áýejaidan kútip alyp, Stambuldan 150-200 shaqyrym alystaǵy ný ormanǵa alyp bardy da, tastandy ǵimaratqa kirgizdi. Basyma oqtalǵan pistolet taqap, bir qaǵazdardy kórsetti, «UQK-nyń ókilimin dep aitasyń» dep májbúrledi. Men qoryqqanymnan talap etkenniń bárin aityp berdim», – dep baiandady ol.
Onyń aitýynsha, orman ishinde taǵy birneshe adam bolǵan. Olar Orta Aziia elderinen Túrkiiaǵa ketken, saqal qoiǵan azamattar bolǵan.
«Menińshe, bul áreketterdiń barlyǵy Túrkiia biliginen saiasi baspana alý maqsatynda jasalǵan», – dep topshylady sportshy.
Videoúndeýiniń sońynda Erkebulan Shynaliev Qazaqstan Respýblikasynyń Ishki ister ministrligi men Bas prokýratýrasynan jaǵdaiǵa quqyqtyq baǵa berip, qaýipsizdigin qamtamasyz etýdi surady.
