1 350 ipotekalyq qaryz alýshyǵa 12 mlrd teńgege qosymsha kómek kórsetildi, denp habarlaidy "Ult aqparat" Qarjy naryǵyn retteý jáne damytý agenttiginiń baspasóz qyzmetine silteme jasap.
2020 jyldyń basynan bastap Qarjy naryǵyn retteý jáne damytý agenttigi Ipotekalyq turǵyn úi qaryzdaryn/ipotekalyq qaryzdardy qaita qarjylandyrý baǵdarlamasyn halyqtyń áleýmettik osal toptary sanatyna jatatyn ipotekalyq qaryz alýshylarǵa qosymsha kómek kórsetý bóliginde iske asyryp keledi.
«Ekinshi deńgeili bankterge halyqtyń áleýmettik osal toptary sanatyna jatatyn qaryz alýshynyń qarjylyq jáne áleýmettik jaǵdaiyn taldaý negizinde negizgi boryshty azaitý, 20 000 teńgeden bastap ai saiynǵy tólemmen jeńildik kestelerin belgileý jáne qaryz alýshynyń kirisin kúnkóris deńgeiinen tómen emes saqtaý túrinde borysh júktemesin jeńildetýdiń qosymsha tetikterin jeke tártippen qoldaný quqyǵy berildi.
Banktiń balansynda esepte turǵan jalǵyz baspanasyn qaryz alýshynyń menshigine qaitarý maqsatynda qarjy institýttaryna qaryz alýshynyń jyldyq 3% syiaqy mólsherlemesi boiynsha qarjylandyrýdy júzege asyrý ne oǵan keiinnen satyp alý múmkindigimen turǵyn úidi jalǵa berý quqyǵy usynylady», delingen habarlamada.
Agenttiktiń málimetinshe, 2021 jylǵy 1 qańtardaǵy jaǵdai boiynsha áleýmettik osal topqa jatatyn jáne jalǵyz baspanasy banktiń balansynda turǵan 1 350 qaryz alýshyǵa 11,9 mlrd teńge somaǵa qosymsha kómek kórsetildi.
Bankterdiń shyǵystaryn óteý úshin Ulttyq banki 44,6 mlrd teńge bóldi.
Ipoteka alýshylarǵa qosymsha kómek kórsetý merzimi 2021 jylǵy 1 shildege deiin dep belgilendi. Shamamen 8 myń qaryz alýshyǵa qoldaý kórsetiledi dep josparlanyp otyr.
«Agenttiktiń qoǵamdyq birlestikter ókilderimen birlesip baǵdarlamanyń iske asyrylýyna júrgizgen taldaýynyń nátijeleri boiynsha ipoteka boiynsha borysh júktemesin azaitý úshin olardy qosymsha qamtý qajettiligi anyqtaldy. Sondyqtan qazirgi ýaqytta baǵdarlamaǵa túzetýler engizý máselesi qaralýda», - dedi Qarjylyq qyzmetterdi tutynýshylardyń quqyqtaryn qorǵaý departamentiniń direktory Aleksandr Terentev.
2020 jylǵy jeltoqsanda agenttik jeke tulǵalardyń 2016 jylǵy 1 qańtarǵa deiin berilgen valiýtalyq ipoteka qaryzdaryn Ulttyq banktiń 2015 jylǵy 18 tamyzdaǵy baǵamy boiynsha (bir AQSh dollary úshin 188,35 teńge) teńgemen qaita qarjylandyrýdy kózdeitin Ipotekalyq turǵyn úi qaryzdaryn/ipotekalyq qaryzdardy qaita qarjylandyrý baǵdarlamasynyń bir baǵytyn aiaqtady.
«Baǵam aiyrmasyn óteý úshin bankterge 114,4 mlrd teńge bólindi. Halyqtyń áleýmettik osal toptaryna jatatyn qaryz alýshy úshin qaita qarjylandyrylatyn qaryz boiynsha syiaqy mólsherlemesi jyldyq 3% mólsherinde, ózge qaryz alýshylar úshin – 12% bolyp belgilendi.
Sonymen qatar 2004 − 2009 jyldar aralyǵyndaǵy kezeńde berilgen jáne jalǵyz baspanamen qamtamasyz etilgen ipotekalyq qaryzdardy qaita qarjylandyrýdy kózdeitin bóliginde iske asyrylýda.
168,2 mlrd teńge somaǵa 27,7 myń qaryz qaita qarjylandyryldy (2021 jylǵy 1 qańtardaǵy derekter). Baǵdarlamanyń osy bóligin iske asyrýǵa Ulttyq bank 130 mlrd teńge bóldi.
Iske asyrý kezeńinde bankter 222,6 mlrd teńge somaǵa 27 202 valiýtalyq ipotekalyq qaryzdy, onyń ishinde Baǵdarlamanyń birinshi bóligi boiynsha 90,5 mlrd teńge somaǵa 13 418 qaryzdy, ekinshi bóligi boiynsha - 132,1 mlrd teńge somaǵa 13 784 qaryzdy aiyrbastady.
Bankter qaryz alýshylardyń syiaqy, turaqsyzdyq aiyby (ósimpul, aiyppul) jáne komissiialar boiynsha 262 mlrd teńge somadaǵy bereshegin keshirdi.
Qazaqstannyń barlyq óńirinde qaryz alýshylardyń shaǵymdaryn qaraý jónindegi komissiialar jumys jasaidy. Komissiia quramyna agenttik ókilderi, ákimdikter, múddeli memlekettik organdar jáne qoǵamdyq birlestikter kiredi.
Aita keterligi, agenttiktiń saitynda qajetti qujattardyń tizbesi ornalastyrylǵan.
