Oblys ortalyǵyndaǵy «Saryarqa» shaǵyn aýdanynda taǵy bir jańa úi boi kóterdi. Bul joly jańa páterlerge 132 otbasy ie boldy. Jarqyrǵan páterdiń kiltterin tapsyrǵan oblys ákimi Bolat Baqaýov úilerdiń qurylysy aiaqtalǵanyna turǵyndardyń ózderinen beter qýanǵanyn aitty.
Óitkeni, «Alliýminstroi» shaǵyn aýdanynyń burynǵy turǵyndary qalada 50-shi jyldary salynǵan eki qabatty ábden tozyǵy jetken, apatty úilerde turyp, mazalary ketken edi. Soltústiktiń sýyq qysy bastaldy. Talai jyldan beri bul jerge jańa úi turǵyzý máselesi de jii aitylyp júrdi. Sodan, osydan úsh-tórt jyl buryn eski úilerdiń ornyna «Saryarqa» atty jańa turǵyn úi kesheniniń jobasy jasaldy. Bul maqsatty isti Úkimet te qoldady. Qazir turǵyn úi kesheni qurylysy «2020 jylǵa deiin óńirlerdi damytý» baǵdarlamasy boiynsha qarqyndy túrde júrgizilýde. Negizi bul bastama qazirgi Úkimet basshysy Baqytjan Saǵyntaev oblysta ákim bolyp turǵan kezde qolǵa alynǵany belgili. Aspanmen talasa boi kóteretin biik úilerdiń jobalaý jumystaryn júrgizýge, injenerlik-kommýnikatsiialyq jeliler tartýǵa qarjy da bólindi. Sóitip, qazir 160-qa jýyq eski, eki qabatty úiler buzylyp, ornyna jańa turǵyn úiler salyna bastady. Bizdiń búgin jazyp otyrǵanymyz da «Saryarqa» shaǵyn aýdanyndaǵy Lomov kóshesi 156/2 mekenjaiynda turǵyzylǵan 3-shi 12 qabatty biik úidiń paidalanýǵa berilgeni jaiynda. Birinshi qabatynda kúzde oblysqa jasaǵan sapary kezinde Elbasy ózi kórip tanysyp shyqqan «Balalarǵa arnalǵan tehnikalyq mektep» ornalasqan.
– Qýanyshymdy sózben jetkizý múmkin emes. Tipti, kúnniń sýyǵy da bizge bilinbeidi qazir. Osy eski, qulaiyn dep turǵan úide 30 jyl boiy turdyq. Armandaǵan jańa páter aldyq, úiler qandai biik, – deidi Jangeldi Eshimov degen turǵyn.
– Jangeldi aitqandai, biz de eski úide 2 bólmeli páterde 17 jyl turdyq. Tozǵan, ábden mazamyz ketti. Tipti, qorqatynbyz, qulap kete me dep. Endi, mine, jańa úiden páter aldyq. Táýelsizdiktiń 25 jyldyǵy, El boldyq degen osy. Rahmet, Úkimetke, Elbasyna! dedi zeinetker Haýa Kúzenbaeva apamyz.
Aitsa aitqandai-aq, bul eski úilerde barlyq qiyn jaǵdailarǵa shydap, talai jyldar turyp kelgen 1272 otbasynyń bári de páterlerge ie bolady degen sóz. Turǵyndarǵa beriletin baspananyń aýmaǵy eski páterlerdiń kólemine sáikes bolatyny eskertilgen. Qurylys bastalardan buryn, turǵyndar ýaqytsha basqa jerlerge kóshirilgen-di. Jaqsy is jalǵasyn taýyp jurtty qýanyshqa bóleýde.
Qala ákimi Nurjan Áshimbetovtiń aitýynsha, bul aýdandaǵy qalǵan eski úiler de aldaǵy ýaqytta súrilip, sodan soń jańa úiler boi kóteredi. Sonymen birge, «Nurly jer» baǵdarlamasy boiynsha jergilikti ákimdik bos jer telimderin úi salýshy kompaniialarǵa bere alady. Biyl jazda «Saryarqa» turǵyn úi kesheniniń alǵashqy kezeńi paidalanýǵa berilip, jańa páter kiltin 105 otbasy aldy. Osydan bir aidai ǵana buryn Sh.Shókin kóshesinde ornalasqan taǵy bir jańa úiden 52 otbasy páter aldy. Oblys ákiminiń aitýynsha, jalpy, óńirdegi turǵyndardyń páter alýǵa degen qajettiligin azaitý maqsatynda aldaǵy jyldary óńir ortalyǵynda 22 jańa úi salynady dep josparlanyp otyr eken. «9 úi kesheni osy jyldyń sońyna qarai paidalanýǵa beriledi. Bul – 900 otbasy jańa pátermen qamtamasyz etiledi degen sóz», – dedi
B. Baqaýov.
Qazir «Saryarqa» shaǵyn aýdanynda jańa úilerdiń qurylysy qarqyndy júrip jatyr. Jyl sońyna deiin osy aýdanda taǵy da 4 jańa úi turǵyndar enshisine berilmekshi. Aýdandaǵy turǵyn úi keshenderi qurylysy aiaqtalǵan kezde 4 myń otbasy pátermen qamtamasyz etiledi.
Farida Byqai,
«Egemen Qazaqstan»
Pavlodar
Sýretti túsirgen Valerii Býgaev
.jpeg)