"Baspana" ipotekalyq uiymynyń basshysy Qairat Altynbekov 7-20-25 baǵdarlamasyna qyzyǵýshylyq tanytyp otyrǵan qazaqstandyqtarǵa 5 keńes berdi.
1. Tek qana alǵa júrińiz
7-20-25 baǵdarlamasyna qatysýǵa sheshim qabyldańyz ba? Demek, Siz jarty jolǵa jettińiz! Endi tezirek páter taýyp, qurylys kompaniiasymen kelisip, bank úshin qujattardy da jedel jinańyz. Eger jeńiske jetý úshin kútý qajet bolsa, kútińiz! Qazir Siz úshin eń bastysy, aqyryn júrip, anyq basyp úili bolý.
2. Ipoteka - oiynshyq emes
Ipoteka - ol qaryz. Syilyq emes, kómek emes. Al qaryzdy qaitarý qajet. Sondyqtan, kelisim-shartqa qol qoimai turyp, jaqsylap oilanǵanyńyz jón. Múmkindigińiz jete me? Eger baiqasańyz, bankter qaryz alýshynyń qarjylyq jaǵdaiyn jiti tekserýde. Sebebi, 7-20-25 baǵdarlamasy boiynsha barlyq qarjylyq táýekel memleket emes, bankterdiń moinynda. Eger Siz jeke kásipker bolsańyz, 7-20-25 baǵdarlamasyna qatysa alasyz. Alaida, bankter Sizdiń jyldyq ainalymyńyzdy, naqty jumys istegenińizdi muqiiat qaraidy. Oǵan daiyn bolyńyz. Jáne kei bankter óz nesielik saiasatynyń negizinde jeke kásipkerlerge nesie bermeitinin de eskerińiz.
3. 7-20-25 boiynsha barlyq aqparatty tekserińiz
7-20-25 baǵdarlamasynyń aty dúrkirep tur. Naryq ta ony baiqap otyr. Bul jaǵdaida 7-20-25tiń jalyna jarmasyp, óziniń kommertsiialyq maqsattaryn sheship alǵysy keletin túrli qurylys kompaniialary, qarjylyq uiymdar, turǵyn úi kooperativteri men alaiaq jandar da az emes. Sondyqtan kez-kelgen aqparatqa kúmánmen qarańyz. 7-20-25 baǵdarlamasy boiynsha nesieni tek seriktes-bankter beredi. Ol boiynsha 7% jyldyq ústemeden basqa eshqandai artyq tólem bolmaýy tiis.
4.Qurylys kompaniiasymen saýdalasýǵa esh uialmańyz
Keide qurylys kompaniialarynyń ózderi turǵyzǵan úidi naryqtan qymbatyraq baǵalaityny bar. Sondyqtan ol baǵa táýelsiz baǵalaýshynyń aktisi boiynsha bekitilgen baǵamen sáikes kelmei jatady. Bul jaǵdaida bankter táýelsiz baǵalaýshynyń aktisi boiynsha bekitilgen baǵaǵa ǵana nesie beredi. Mysaly, qurylys kompaniiasy páterdi 15 million teńgege, al baǵalaýshy 12 millionǵa baǵalasa, bankterdiń nesie somasy 9,6 mln. teńge bolmaq. Oǵan ózińizdiń 2,4 mln. teńge alǵashqy jarnańyzdy qosasyz. Qurylys kompaniiasy qoiǵan baǵaǵa 3 mln. teńge jetpei tur. Ne isteý kerek? Bul jaǵdaida qurylys kompaniiasymen esh qysylmai saýdalasý kerek, nemese aiyrmasyn óz qaltańyzdan tóleý qajet bolady.
5. 25 jylǵa bailanýdyń esh qajeti joq
7-20-25 baǵdarlamasy tek qana 25 jylǵa nesie beredi dep oilaityn azamattar kóp. Bul qate pikir. 25 jyl - ol shekti merzim. Sondyqtan, Siz nesieni ózińiz qalaǵan merzimge, 1 jyl, 5 jyl, 10 jylǵa da ala alasyz. Merzimdi ózińiz anyqtaisyz. Merzim neǵurlym az bolsa, ústinen qosyp tóleitin soma da az bolady.
