Qazaqstanda jyljymaityn múlik baǵasy kúrt qymbattady. Kóptegen sarapshylar muny zeinetaqy jinaqtaryn merziminen buryn alýdan týyndaǵan dúrligýmen bailanystyrady. Osy oraida Qazaqstannyń Birikken rieltorlar qaýymdastyǵy prezidentiniń keńesshisi Nina Lýkianenko otandyq turǵyn úi naryǵyndaǵy ahýal men keleshegi týraly pikirimen bólisti, dep habarlaidy QazAqparat.
Onyń aitýynsha, qańtar aiynda jańa baspaǵa baǵasy 3%-ǵa, al jabdyqtalǵan baspanany qaita satý kezinde 5%-ǵa kóterilgen.
«Alaida, zeinetaqy qarajatyn paidalaný erejeleri tek qańtar aiynyń sońynda paida bolǵandyqtan, bul aqshaǵa baspana satyp alý múmkindigi qańtardaǵy mámilelerge yqpal etken joq», - dedi Nina Lýkianenko.
Qazirgi ýaqytta satýshylar úige suranys kóbeigendikten baǵany qymbattatyp jatqany baiqalady.
«Bul naryqqa da, eki jaqqa da jaqsy áser ete qoimaidy. Endi ári qarai arzandaý týraly aitar bolsaq, bul klientterdiń áreketine bailanysty bolady. Eger satyp alý týraly sheshim satýshylardyń jańa «tábeti» boiynsha qabyldansa, onda jaqyn arada arzandamaidy. Al eger satyp alýshylardyń sheshimderi «baǵa-sapa» qatynasyna sáikes kelse, erteli-kesh naryq tepe-teńdik kúiine keledi. Árine, jyl sońyna deiin, tólem qabileti rastalǵan suranystyń artýynan mámilelerdegi baǵalar áli de joǵarylaýy múmkin», - deidi Nina Lýkianenko.
Jyljymaityn múlik alýdy josparlap júrgenderge sarapshy tańdaý jasaýǵa asyqpaýǵa keńes beredi.
«Asyǵý eshqashan jaqsy keńesshi bolǵan emes, satyp alý maqsatyn, páterdiń ne úshin qajet ekenin jáne nelikten qazir alý kerektigin anyqtaý kerek. Sheshim qabyldaýǵa asyqpańyz, satýshymen saýdalasyńyz», - dep atap ótti Nina Lýkianenko.
Sonymen birge, spiker baspana salýshylardyń baǵa kóterýdegi alypsatarlyǵy týraly aitty.
«Joq, baǵanyń ósýi alypsatarlyq emes, satyp alý qabileti de ulǵaidy. Tipti páter alýǵa qarjysy jetpegender de qarajat qosyp, ipoteka arqyly alyp jatady. Qazir satyp alýshylardan alýan túrli somalarmen ótinishter kórip otyrmyz, BJZQ-dan tek 2 mln qarajaty barlarmen de mámile bekitemiz. 15 million jáne odan joǵary somaǵa da kóptegen ótinishter bar, 40 millionnan bastalatyn da ótinishter bar», - dep túsindirdi N. Lýkianenko.
Jalpy, keibir sarapshylardyń baǵalaýynsha, Qazaqstanda páter quny bir jylda 13 paiyzǵa ósti. Jyljymaityn múlik baǵasy zeinetaqy jinaǵynan qarjy alý baǵdarlamasyna bailanysty qymbattaǵan.
Búginde qaitalama naryqtaǵy sharshy metrdiń baǵasy rekordtyq 230 myń teńgeden asty. Úlestik qurylysqa da baǵa kóterildi, mysaly, senimdiligi jaǵynan ózin kórsete bilgen kompaniialardyń Nur-Sultandaǵy qurylysy bastalǵan TK baǵasy – sharshy metrine 346 myń teńge, iaǵni aýdany 85 sharshy metrden asatyn komfort klasty úsh bólmeli páter 29 mln teńgeden asady. Al ótken jyly úlestik qatysý páteriniń baǵasy 24-25 mln teńge bolǵan edi. Asa tanymal emes kompaniialarda osyndai turǵyn úidiń sharshy metri 280 myń teńgeden usynylyp otyr. Biraq munda táýekel yqtimaldyǵy joǵary.
Alaida sarapshylar jappai satyp alýlar bolmaidy dep boljap otyr. Ekonomisterdiń aitýynsha, jinaqtaǵy artyq qarajatqa qazaqstandyqtardyń tek 6%-y nemese 700 myńnan astam adam qol jetkize alady.
