Elimizde mádeniet salasy qyzmetkerlerin áleýmettik qoldaý baǵytyndaǵy sharalar kezeń-kezeńimen kúsheitilip jatyr. Atalǵan baǵyttaǵy jumystar Memleket basshysy Qasym-Jomart Toqaevtyń tapsyrmalary aiasynda iske asyrylyp keledi. Prezident óz sózinde mádenietti ulttyq biregeilikti nyǵaitýdyń, rýhani qundylyqtardy dáripteýdiń jáne qoǵamdyq kelisimdi bekemdeýdiń mańyzdy tetigi retinde únemi ataidy.
Mádeniet salasy qyzmetkerlerin baspanamen qamtamasyz etý – saladaǵy mańyzdy baǵyttardyń biri. 2024 jyly Memleket basshysynyń qoldaýymen Astana qalasynda eńbek etetin mádeniet salasy qyzmetkerlerine 200 páter kilti tabystaldy. Al 2026 jyly bul bastama jalǵasyn taýyp, Almaty qalasyndaǵy mádeniet uiymdarynyń taǵy 60 qyzmetkeri jańa baspanaǵa qol jetkizdi.
Sonymen qatar mádeniet qyzmetkerleri elimizdiń densaýlyq saqtaý júiesinde kózdelgen barlyq áleýmettik kepildikti paidalana alady. Atap aitqanda, tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý júiesi aiasynda meditsinalyq qyzmetterge júginý múmkindigi qarastyrylǵan.
Mádeniet pen óner salasynyń jekelegen qyzmetkerlerine qosymsha áleýmettik jeńildikter beriledi. Atap aitqanda, joǵary memlekettik ataq men marapattary bar azamattar tegin meditsinalyq kómek alý quqyǵyna ie.
Sondai-aq atalǵan sanattaǵy azamattar men olardyń jubailaryna jylyna bir ret elimizdegi shipajailarda tegin em alyp, saýyqtyrý demalysyn ótkizý múmkindigi usynylady. Al olardyń balalaryna emdik-saýyqtyrý qyzmetterin 50 paiyz jeńildikpen paidalaný qarastyrylǵan.
Erekshe eńbek jaǵdaiynda qyzmet etetin óner ókilderine de airyqsha qoldaý kórsetiledi. Elimizde kásibi eńbek ótili keminde 20 jyldy quraityn jáne zeinet jasyna jetkenge deiin eńbek jolyn aiaqtaǵan balet ártisterine arnaiy ai saiynǵy tólem beriledi. Búginde mundai tólemdi respýblika boiynsha 56 óner qyzmetkeri alyp otyr.
2024 jyldyń qańtar aiynan bastap memlekettik mádeniet uiymdarynda eńbek etetin halyq bii óneriniń ártisterine de arnaiy áleýmettik tólem engizildi. Bul qoldaý túri 55 jasqa tolǵan jáne keiingi jeti jyl ishinde mindetti kásiptik zeinetaqy jarnalary turaqty aýdarylǵan azamattarǵa beriledi.
