Sarapshylardyń esepteýinshe, 1 bólmeli baspanaǵa qajetti bastapqy jarnany 10 jyl boiy jinaý kerek eken. Iaǵni otbasynyń tabysy 200 myńnan kem bolmaǵan jaǵdaida, onyń 20 myńyn ai saiyn úzbei salyp otyrsa ǵana páterge qol jetkize alady. Bul týraly KTK tilshilerine sarapshylar aityp berdi.
Zertteý qorytyndysyna qaraǵanda, 1 ǵana jalaqymen baspanaly bolý bizde tym qiyn eken. Bul múmkin bolǵannyń ózinde, qonys toiyn jyldar boiy kútýge týra keledi. Mysaly, otbasynyń tabysy 200 myń bolsa, bolashaq baspana úshin ai saiyn onyń 10 paiyzyn ǵana jinai alamyz. Al, qalǵany kúndelikti shyǵynnan artylmaidy eken. Osylaisha, tek arada 10 jyl ótken soń 1 bólmeli páterge qajetti bastapqy jarna jinalady. Bul infliatsiia deńgeiin qospaǵandaǵy esep. Al, osyndai tabyspen páterdi qolma-qol satyp alý úshin kemi 20 jyldai ýaqyt qajet. Aiyna 100 myń teńgeden jinaý úshin, kiris kólemi 350 myń bolýy tiis. Bul qarqynmen bastapqy jarnany 3 jylda jinaýǵa bolady. Al, baspanaǵa ipotekasyz 7-8 jylda qol jetkize alasyz.
Páterdi 5 jyldyń ishinde qolma-qol alǵysy keletinder bolsa, aiyna 200 myńnan depozitke salyp otyrýlary kerek. Al, 150 myń teńge kólemindegi otbasylyq tabyspen úili bolý múmkin emes. Sarapshylar osylai ashyǵyn aitty.
krisha.kz portalynyń sholýshysy Alina Býravtseva "Eger otbasy páter jaldap turatyn bolsa,150 myń teńge kólemindegi tabyspen múldem aqsha jinai almaidy. Aqsha kúndelikti shyǵynnan artylmaidy. Iaǵni, mundai tabyspen bastapqy jarnanyń ózin jinaý múmkin emes jaǵdai", – deidi.
Al, "Turǵynúiqurylysjinaqbanki" AQ filialy direktorynyń orynbasary Dias Raqymjan "Eger adam páterli bolýdy maqsat etken bolsa, oǵan tezirek qol jetkizgisi kelse, kei jerlerde ózine shekteý qoiýy qajet. Máselen, bir klientimiz bastapqy jarnany qysqa merzimde jinaý úshin túrli taǵamdardan bas tartqan, otbasysy qydyrýdy toqtatqan. Únemdeý arqyly, 3-4 jylda qomaqty qarjy jinaýǵa bolady" – deidi.
Jalpy tezirek baspana kiltin alý úshin, azamattardyń kóp nársege shekteý qoiǵany abzal. Mamandardyń bul keńesi, ásirese, qazaqtar úshin qiyndaý bolǵaly tur. Óitkeni, úili bolmai, toi jasamaý kerek eken. Tamaqtan da shekteý bolǵany jón.
Ótken jyly osylai ózine kóp nárseden shekteý qoiǵandar kóp bolsa kerek, turǵyn úi naryǵy qatty jandanypty. Saýda-sattyq birden 28 paiyzǵa ósken. Mamandar buǵan klientterine túrli múmkindikter berip otyrǵan qurylys kompaniialary ǵana emes, memlekettik baǵdarlamalardyń da oń áser etkenin aitady. Al, suranysqa jer úi emes, páterler kóbirek ie eken.
Ásirese, jurt, shaǵyn baspanalardy kóptep satyp alǵan. Aýmaǵy úlkenderine qyzyǵýshylyq tómen. Muny qurylysshylardyń eskergeni abzal.Ári jańa úiler kóbirek satylypty. Biyl da turǵyn úi naryǵynda asa ózgeris bolmaidy degen boljam bar. Al, sharshy metrlerdiń baǵasyna kelsek, ol da 2018 jyly qatty qubylmaidy. Sondyqtan, baspanaly bolýdy josparlaǵandar bolsa, baǵanyń arzandaýyn kútip, ýaqytty sozýdyń qajeti joq.
