Foto: Azamat Qusaiynov
Ál-Farabi atyndaǵy QazUÝ kitaphanasynda kórnekti memleket jáne qoǵam qairatkeri, QR Memlekettik syilyǵynyń laýreaty, professor Sheriazdan Eleýkenovtiń týǵanyna 95 jyl tolýyna orai «Ulttyq kitaptaný máseleleri: tarihy jáne búgingi jaǵdaiy» atty halyqaralyq ǵylymi-tájiribelik konferentsiia ótti.
Jiyndy Jýrnalistika fakýltetiniń dekany, filologiia ǵylymynyń kandidaty Qanat Áýesbai júrgizdi.
Ál-Farabi atyndaǵy QazUÝ-diń basqarma múshesi – akademiialyq máseleler jónindegi prorektory Abai Qazmaǵambetov kirispe sózinde Sh.Eleýkenov týraly: «Ol tabandy eńbegi men izdenisteriniń nátijesinde filologiia ǵylymdarynyń doktory, professor, Qazaqstannyń eńbek sińirgen mádeniet qairatkeri, Qazaqstan Respýblikasy Memlekettik syilyǵynyń laýreaty atandy. Adaldyq, adamgershilik, eńbekqorlyq qaǵidalaryn basty orynǵa qoiǵan ǵalym Sheriiazdan Eleýkenuly qandai qyzmet atqarsa da ulttyq ustanymynan tanǵan emes», – dedi.
«Qazaq ádebieti» gazetiniń bas redaktory Baýyrjan Jaqyp Sh.Eleýkenovtiń ustazdyq joly men ǵylymdaǵy ónegesin negizgi baiandamasyna arqaý etti. Professorlar Janǵara Dádebaev, Namazáli Omashuly, Qanseiit Ábdezuly, Qońyr Muqataiqyzy, Temirǵali Kópbaev, Saǵatbek Medeýbekuly kitaptaný máselelerimen qosa qairatkerdiń ádebiettaný, baspa isi salasyndaǵy eńbegin taldady. Professor Temirǵali Kópbaev Sheriiazdan Rústemulynyń kóptomdyǵyn shyǵarý isi toqtap qalǵanyn aityp, osy jaǵdaidyń sheshilýi kerek ekenin aityp ótti. Ǵalymdar Nurdaýlet Aqysh, Serikqazy Qorabai, Gúljahan Orda, Elena Dýdinova Sheriiazdan Rústemulynyń qalamynan shyqqan týyndylardy baiandamalaryna arqaý etti. Sh.Eleýkenovtiń uly, fizika-matematika ǵylymynyń doktory Dastan Eleýkenov halyqaralyq konferentsiiany uiymdastyrǵan ýniversitet pen fakýltetke, baspagerlik-redaktorlyq jáne dizainerlik óner kafedrasynyń ujymyna alǵys aityp, áke amanaty men ustanymy qandai bolǵanyn aityp berdi.
Qyrǵyzstannyń J.Balasagyn atyndaǵy QUÝ-niń Jýrnalistika jáne kommýnikatsiia institýtynyń direktory, áleýmettik ǵylym kandidaty, dotsent Shirin Kostiýk jáne Túrkiianyń Sakariia ýniversitetiniń professory Mýhammed Bilal Chelik túrki eline ortaq tulǵa Sh.Eleýkenovtyń qairatkerlik qyry men baspa isindegi eńbegine toqtaldy.
Jiyndy qorytyndylaǵan Jýrnalistika fakýltetiniń dekany Qanat Áýesbai: «Sheriiazdan Rústemulynyń ustazdyq jolymen, ǵylymdaǵy, ádebiettanýdaǵy, kitaptanýdaǵy, kórkem sózderi qyrlarymen tanystyq. Eleýkenovtaný degen ǵylymnyń jeke bir salasy qalyptasyp kele jatyr dep esepteimin. Bul áli de tolyǵa túsetin jeke bir sala bolmaq», – dedi.
Halyqaralyq konferentsiia materialdary arnaiy jinaq bolyp jaryq kórip, is-shara barysynda kópshilikke tanystyryldy. Is-shara aiasynda ál-Farabi kitaphanasynyń foiesinde Sh.Eleýkenov shyǵarmashylyǵy men ómirine arnalǵan kitap kórmesi jáne fotokórme uiymdastyryldy.
Qaragóz Serikqyzy,
baspagerlik-redaktorlyq jáne dizainerlik óner kafedrasynyń oqytýshysy
