15 maýsym kúni Astanadaǵy amfiteatrda «Azia» jáne «Melomen» toptarynyń kontserti ótip, kórermender erekshe ásermen qaitty. Al bizge suhbat bergen «Azia» tobynyń ánshisi Renat Basit jas ánshilerdi túsiný múmkin emes, olar basqa býyn dep eseptese, «Melomen» tobynyń ónerpazdary ýaqyt óte ánge talǵamdary ózgergenin aitady.
Ult.kz tilshisi kontsertti tamashalap, ónerpazdarmen suhbattasyp qaitty.
Kontserttik baǵdarlama Roza Baǵlanova atyndaǵy «Qazaqkontsert» memlekettik akademiialyq kontserttik uiymy usynǵan «GRAND FEST» mýzykalyq festivali aiasynda ótti.
Hit ánder shyrqalǵan kesh
«Azia» jáne «Melomen» toptary keń aýditoriianyń súiispenshiligine bólengen hit ánderdi oryndap, este qalar kóńildi kesh usyndy.
Kontserttik baǵdarlamada «Ǵajaiyp kúi», «Janym», «Opmai-opmai», «Qandaisyń qandai», «Súigenim bol», «O, mahabbat», «Arman shaǵala», «Sen meni kút» syndy týyndylar shyrqalady. Eriksiz bilegiń keletin ánder de, ár óleń joly jattalyp qalǵan bárine tanys shyǵarmalar da usynylady.
Bul ánderdiń alǵashqy áýeninen-aq, san estelik jadymyzda jańǵyryp qoia beredi. Bir kezderi mektep keshinde júrekti terbetken, kólik terezesinen kóz salyp, qiialǵa jetelegen, al keide únsiz serik bolǵan sol bir ánder...
Jurtpen birge amfiteatr sahnasyn qorshaǵan sýburqaqtar da bilep, túrli-túske boialyp sala berdi. Bul kontserttiń energiiasyn kúsheitip, qyzdyra túskendei.
«Melomen» tobyna biyl 16 jyl. Osy ýaqytqa deiin jaryqqa shyqqan ánderdiń ishindegi halyqtyń júreginen shyqqan, jaqsy kóretin, el biletin, suranysqa ie, «osy án arqyly biz Melomen-di tanimyz» deitin 10 hit ándi osy kontsertte oryndadyq. Atap aitsaq, «O, mahabbat», «Arman shaǵala», «Súigenim bol» siiaqty ánder oryndaldy. Jalpy bizdiń qorjynymyzda júzden astam án bar», ‒ deidi «Melomen» tobynyń ánshisi Rolan Qazretov.
Amfiteatrdyń sahnasyn jandyrǵan ánshilerdiń tanys ta, tanymal ánderin tyńdaǵan jurt oryndarynan turyp bilep, qosyla án shyrqap, máre-sáre bolyp jatty. Olardyń arasynda ǵajap áserlerin foto-videoǵa taspalap alyp jatqandary da boldy.
Kontsert kórermeni Ainur Qýatbekova ónerpazdardyń ánderin tyńdap, stýdent kezin esine alyp, nostalgiialyq kúimen qaitqanyn aitady.
«Óte kóńildi, tamasha kesh boldy. Jigittermen qosylyp án de aittyq, bi de biledik. Stýdent kezimde «Azia» tobynyń eń alǵashqy kontsertine barǵanmyn. Ol kezde jaspyz. Qyzdarmen kúlip-oinap, tamasha kóńil kúimen Almatydaǵy Respýblika saraiynan jatahanaǵa qaitqanymyz esimde. Qazir mine jiyrma jyldan keiin qaita sol sezimdi bastan keship otyrmyn. Sol úshin osy sharany uiymdastyrýshylarǵa alǵys aitamyn. Búgin Astanada aýa raiy da tamasha bolyp tur. Tabiǵat ádeii biz úshin jaǵdai jasap qoiǵandai», ‒ dep sezimimen bólisti kórermen.
«Óz repertýarymyzdaǵy hit bolǵan ánderdiń barlyǵyn aittyq. 21 jylda shyqqan ánderdiń arasynan halyqtyń júregine jetken, súiip tyńdaityn «Ǵajaiyp kúi», «Mahabbat araly», «Opmai-opmai» siiaqty ánderdi oryndadyq», ‒ deidi «Azia» tobynyń ánshisi, Qazaqkontserttiń Almaty filialynyń direktory Renat Basit.
«Biz olardy túsine almaimyz»
10 ‒ 20 jyldan artyq sahnada júrgen jigitterdiń ánin eńbektegen baladan eńkeigen qariiaǵa deiin súiip tyńdap, qosyla shyrqap, qoshemet bildirip jatty.
Al sahnaǵa jańa kelgen jas ánshiler týraly 21 jyl sahnada júrgen Renat Basit ne oilaidy?
«Biz olardy túsine almaimyz. Olar bizdi ǵana emes, úlken býynnyń bárin basyp tastady. Biz solardyń arasynan «Opmai-dy» shyǵaryp, birdeńe qylyp júrmiz ǵoi áiteýir. Al jańa býyn qandai óleń jazady, múldem tartpaidy. Óitkeni múldem basqa býyn keldi. Olar túsiniksiz. Biraq jaqsy jaǵynan. Solarǵa qarap, úlken býyn da ózgerip, damyp jatyr. Bizdiń jastarymyzdy shetel tyńdap jatyr», ‒ deidi Renat Basit.
«Azia» toby áli de jańa ánder jazyp, jas ánshilermen kollaboratsiia uiymdastyryp júr eken. Qanay esimdi tanymal jas ánshimen birigip án de jazypty. Ándi naqyshyna keltirip oryndaýda, ony óńdeýde tájiribeli maman retinde Azia-lyqtarda eshqandai másele týyndamaitynyn aitady. Biraq:
«Ótý problema. Mysaly buryn án jazamyz, bir ret teledidarǵa shyǵamyz, bizdiń ánimiz ‒ hit. Qazir qansha án jazsań da hit bolmaidy, óitkeni qazir basqasha jumys isteý kerek. Ony jumys istetýge qasyńda 10 adam júrýi kerek. Burynǵydai óziń jazyp, stýdioda shyǵara almaisyń», ‒ deidi ol.
Al «Melomen» tobynyń ánshileri jasyń ulǵaiǵan saiyn ánge talǵamyń da ózgeredi dep otyr. Olar qazir ánge talǵam men talapty kúsheitkenderin aitady.
«Adamdardyń barlyǵy qatelesedi. Degenmen de «ótkenge ‒ ókinbe» deidi ǵoi. Sondyqtan biz esh nársege ókinbei, sabaq alamyz. Biraq árine shyǵarmashylyǵymyzdy bastaǵan kezden beri bizde ózgerister bar. Qateliktermen jumys isteimiz. Buryn ándi shetinen jaza beretinbiz, al qazir saralap-saralap jazamyz. Múmkin jasyń ulǵaiǵan saiyn aqylyń da tolyǵa ma, sondai siiaqty», ‒ deidi «Melomen» tobynyń ánshisi Rolan Qazretov.
«GRAND FEST» festivali – elordanyń mádeni ómirindegi mańyzdy oqiǵaǵa ainalýdy maqsat tutqan, otandyq mýzykalyq ónerdi nasihattaýǵa jáne qala turǵyndarynyń mádeni tynys-tirshiligin baiytýǵa baǵyttalǵan jobalardyń biri. Ashyq aspan astyndaǵy amfiteatr sahnasy, jandy mýzyka jáne janrlyq ártúrlilik - barlyǵy da túrli býyn ókilderin óner ainalasyna toptastyratyn jyly ári shabyt syilaityn atmosferany qalyptastyrady.
