Shymkent qalasynyń ákimdigi Turan shaǵynaýdanyndaǵy turǵyndardyń shaǵymdaryna jaýap berdi, dep habarlaidy QazAqparat.
Áleýmettik jelide Shymkent qalasyndaǵy Turan shaǵynaýdany turǵyndarynyń shaǵymy tarady.
Jer máselesine qatysty týyndaǵan suraqtarǵa Shymkent ákimdigi jaýap berdi.
Taldaý nátijesinde 2021 jyly Turan shaǵyn aýdanynyń egjei-tegjeili josparlaý jobasyna túzetý engizý jumysy júrgizilip, birneshe nusqasy ázirlengen.
Mamandardyń aitýynsha áleýmettik jeliler men telearnalarda taraǵan aqparatta Turan shaǵynaýdany turǵyndarynyń alańdaýshylyǵyn týǵyzǵan málimet – egjei-tegjeili jobalaý josparynyń bir nusqasy ǵana.
Ol - resmi bekitilmegen qujat.
«Qazaqstan Respýblikasynyń Prezidenti Qasym-Jomart Toqaevtyń «Halyq únine qulaq asatyn memleket» tujyrymdamasyna sáikes, qalanyń damýyna qatysty kez kelgen másele turǵyndardyń pikiri men kózqarasyn eskere otyryp qabyldanady. Sondyqtan zań talaptary men qurylys normalaryna sáikes Turan shaǵyn aýdanynyń egjei-tegjeili josparlaý jobasy naqty bekitilmei turyp, bul másele boiynsha aldyn-ala qoǵamdyq tyńdalym ótkiziledi» - delingen ákimdik tarapynan berilgen habarlamada.
Qoǵamdyq talqylaýdyń ótetin orny men ýaqyty aldyn ala buqaralyq aqparat quraldarynda jáne áleýmettik jeliler arqyly turǵyndarǵa habarlanady.
Qoǵamdyq tyńdaýda turǵyndar egjei-tegjeili jobalaý josparyn bekitý máselesi boiynsha daýys beredi.
Iaǵni, túpkilikti sheshimdi turǵyndardyń ózderi qabyldaidy.
«Qazaqstan Respýblikasynyń zańdary azamattardyń menshik quqyǵyn erekshe qorǵaýǵa alyp, oǵan kepildik beredi. Memleket óz azamattarynyń múlkinen zańsyz jolmen aiyrylýyna, baspanasyz qalýyna jol bermeidi. Shymkent qalasynyń barsha turǵyndaryn qoǵamdyq talqylaýǵa qatysýǵa jáne qalamyzdyń kórkeiýi men damýy úshin atsalysýǵa shaqyramyz» - delingen habarlamada.
