Adamnyń shyn minezi, oi-pikiri hám qabileti jeke basy úshin saiasi-ekonomikalyq táýelsizdik týǵanda ǵana bilinedi (salystyrmaly túrde aityp otyrmyn, absoliýt táýelsizdik bolmaidy, árine).
Iaǵni shama-sharqyna qarai jaily baspanasy, turaqty jumysy hám tabys kózi, zeinet pen muqtajdyq járdemaqysy bar; jylyna kem degende bir márte shetke shyǵyp kele alatyn erkindigi bar; aptasyna az degende birneshe márte jany jaqyn adamdarmen oiyn-saýyq ortalyqtaryna, ia saiasi-áleýmettik klýbtarǵa baryp turatyn jaǵdaiy bar; mádeniet pen sport salasyndaǵy hobbiin damytatyn, ǵylym salasyndaǵy talabyn ushtaityn ári lázzat alatyn múmkindigi bar; boidaq bolsa, basyna jetetin, otbasyly bolsa, bala-shaǵasyna jetetin, zeinetker bolsa, kútimine jetetin qory bar adam ǵana týǵan-týys hám dos-jarmen qarym-qatynasta da, bilikpen qarym-qatynasta da oiyn búkpei aitatyn shynshyl, anyq azamatqa ainalady.
Órkenietti rejimder zańnyń ústemdigin ornatý arqyly halqyna osyndai saiasi-ekonomikalyq azattyq áperedi. Al qýdalaýshy rejimder zańnan ústemdigin ornatý arqyly halqyna bas kótertpei, kishigin - ulyǵyna, adalyn - aramyna, ádilin - ákkisine, mamanyn - mansapqorǵa, kárisin - jasyna kiriptar etip qoiady. Kiriptar adamnyń shyn sóileýi, shyn is qylýy, árbirden soń shyn ómir súrýi qiynnyń qiyny.
"Kisiniń qolyna qaraǵannyń kúni qurysyn" deidi qazaqtyń bir maqaly. Ras sóz.
Ǵalym Boqashtyń feisbýktaǵy paraqshasynan
