Qazaqstannyń Bas prokýratýrasy Muhtar Ábliazovty tergeýge shaqyrdy, - dep habarlady "Ult aqparat" vedomstvonyń baspasóz qyzmetine silteme jasap.
Bas prokýratýra asa aýyr qylmys deregi boiynsha Ábliazovqa qatysty qylmystyq isti tergep jatyr. Olardyń aitýynsha, tergeý barysynda kúdiktiniń Tátishevti qasaqana óltirýdi uiymdastyrý áreketterin anyqtaityn dálelder tabylǵan.
Alaida, Ábliazovtyń Qazaqstannan tys jerde bolýyna jáne kelýden jaltarýyna bailanysty Bas prokýratýra tergeýge shaqyrýdy elimizdiń jáne Frantsiianyń aqparat quraldary arqyly taratty.
"Kúdikti Ábliazov Muhtar Qabyluly, Sizge 2018 jyly 16 tamyz saǵat 15.00-ge deiin Qazaqstan Respýblikasy Bas prokýratýrasynyń ákimshilik ǵimaratyna kelý kerek: Qazaqstan Respýblikasy, Astana qalasy, Máńgilik el dańǵyly, 14, jedel-tergeý tobynyń basshysy - Qazaqstan Respýblikasy Bas prokýrorynyń kómekshisi Bekjan Ermuhanbetulyna. Tergeý sharalaryna qatysý úshin kúdikti qorǵaýshysyn ózdigimen shaqyrýǵa quqyly nemese qylmystyq protsessti júrgizýshi organnan advokattyń qatysýyn surai alady (QR QPZ 68-baby)", - delingen organnyń habarlamasynda.
Aita keteiik, kúdikti tergeý sharasyna qorǵaýshysyn shaqyra alady nemese qorǵaýshy berý týraly ótinish jaza alady. Eger qorǵaýshyny kúdikti nemese onyń zańdy ókilderi, tapsyrmasy boiynsha qatysatyn ózge de tulǵalar shaqyrmaityn bolsa, qorǵaýshyny organ beredi. Eger belgilengen ýaqytta kelýge kedergi qandai da bir sebep bolsa, qorǵaýshyny qatystyrý jóninde ótinish bolsa, kúdikti nemese onyń zańdy ókili qylmystyq tergeýdi júrgizetin organǵa aldyn ala eskertýi tiis.
Buǵan deiin QR Bas prokýratýrasynyń ókilderi Muhtar Ábliazovtyń shetelde sot tóreliginen jasyrynyp, quqyqqa qaishy áreket jasaýdy jalǵastyryp otyrǵanyn málimdedi. Sot QDT-ny ekstremistik uiym dep tanydy.
Sonymen qatar, QDT jariialanymdaryn taratqandardyń qylmystyq jaýapqa tartylatyny týraly qazaqstandyqtarǵa eskertildi.
